Qazaqstanda eńbekke qabiletti 9 mln adam tegin kýrstardan óte alady
Mınıstrlik málimetinshe, elimizde Áleýmettik kodeks jobasy sheńberinde azamattardy jappaı oqytý jáne bilim berý sapasyn jaqsartý úshin negizder qalyptastyrylyp, ol zańnamalyq deńgeıde bekitiletin bolady.
Birinshiden, tegin oqytý kýrstarymen qamtylatyn eńbekke qabiletti azamattar sanyn birneshe ese arttyrý josparlanǵan.
Eger buryn QR Eńbek jáne halyqty áleýmettik qorǵaý mınıstrliginiń jelisi boıynsha azamattardyń jekelegen sanattary ǵana oqytylyp kelse (bul shamamen jylyna 500 myń adam), endi áleýmettik sanaty men mártebesine qaramastan eńbekke qabiletti jastaǵy barlyq azamat qamtylady (bul 9 mln adamǵa jýyq).
Atap aıtqanda, memleket jumys berýshilerdiń ótinimi boıynsha jumyssyzdar men halyqtyń jekelegen nysanaly sanattary úshin qysqa merzimdi tegin oqytý kýrstaryn uıymdastyratyn bolady. Bul rette olarǵa oqytýdyń túrli formattary, onyń ishinde skills.enbek.kz platformasynda onlaın oqytýdy usyný kózdelýde. Búgingi kúni bul platformada 151 kýrs ornalastyrylǵan, onyń 97-nen tegin ótýge bolady.
«Jumys berýshiler óz qyzmetkerleri úshin jańa tehnologııalardy engizýdi nemese jańa óndirister ashýdy eskere otyryp, biliktilikti arttyrý, qaıta beıindeý kýrstaryn uıymdastyrady. Oqytý jumys berýshiniń tańdaýy boıynsha jumys oryndarynda, oqý ortalyqtarynda nemese bilim berý uıymdarynyń bazasynda ótetin bolady.
Azamattar áleýmettik mártebesine baılanysty memleket nemese jumys berýshiler uıymdastyratyn tegin kýrstardan óte alady nemese aqyly kýrstardy óz qalaýy boıynsha tańdaı alady», - delingen mınıstrlik málimetinde.
Ekinshiden, elimizdiń joǵary oqý oryndary men kolledjderinde oqytý sapasyn jaqsartý úshin keshendi sharalar qabyldaý kózdelip otyr. Ulttyq biliktilik júıesin qaıta júkteý osyǵan baǵyttalǵan.
«Jumys berýshiler kásiptik standarttar arqyly bilim berý baǵdarlamalary jańartylatyn jumys kúshiniń daǵdylaryna talaptar qoıatyn bolady.
Kásibı biliktilikterdi taný ortalyqtary kásibı biliktilikterdi, onyń ishinde resmı, beıresmı jáne ınformaldy bilim berý arqyly alynǵan mamandardyń jekelegen daǵdylaryn baǵalaıdy jáne tıisti sertıfıkattar beredi», - dedi vedomstvodan.