Qazaqstanda eńbek quqyqtaryn qorǵaýdyń qosymsha qadamdardy pysyqtalyp jatyr

NUR-SULTAN. QazAqparat – Búgin QR Kásipodaqtar federatsııasynyń jumyskerlerdiń eńbek, áleýmettik-ekonomıkalyq quqyqtaryn qamtamasyz etý jónindegi qyzmetin talqylaý boıynsha QR Prezıdenti janyndaǵy Adam quqyqtary jónindegi komıssııanyń otyrysy ótti, dep habarlaıdy QazAqparat tilshisi.

«Komıssııanyń otyrysynda Qazaqstan halqynyń eńbek quqyqtaryn qorǵaý máselesi qaralyp, Kásipodaqtar federatsııasynyń jumysy tyńdalady. Osy oraıda qabyldanyp jatqan sharalar egjeı-tegjeıli talqylanady. Álemdegi pandemııaǵa baılanysty kóp jerde jumys oryndarynyń qysqarýy, kásipkerler tabysynyń tómendeýi sııaqty jaǵdaı qalyptasyp otyr. Sonymen qatar, jumysshylardyń qyzmetinen aıyrylýy múmkin degen syn-qaterler bar. Bul turyǵyda qandaı sheshim qabyldaý, eńbek quqyqtaryn qorǵaý baǵytynda qosymsha qadamdardy pysyqtaıtyn bolamyz», - dedi QR Prezıdenti janyndaǵy Adam quqyqtary jónindegi komıssııanyń tóraǵasy Qanat Mýsın otyrystyń aldynda tilshilerge bergen suhbatynda.

Talqylaýǵa qatysqandar halyqtyń, onyń ishinde barlyq sanattaǵy jumyskerlerdiń quqyqtyq saýattylyq deńgeıin arttyrý áleýmettik jańǵyrtýdyń memlekettik baǵdarlamalaryn tabysty iske asyrýdyń qajetti ári mindetti sharty bolyp sanalatynyn sóz etti.

Osy oraıda prokýratýra organdary men memlekettik eńbek ınspektorlaryna jumys berýshilerdiń, eń aldymen ekonomıkanyń taý-ken metallýrgııa jáne munaı-gaz salalaryndaǵy kásiporyndardyń, qurylys uıymdarynyń eńbekti qorǵaý jónindegi standarttardyń, erejeler men normalardyń talaptaryn saqtaýyna baqylaýdy kúsheıtý usynyldy.

Budan bólek, búgingi otyrys barysynda QR ІІM Qylmystyq-atqarý júıesi komıtetiniń sottalǵandardyń qaýqarsyz toptarynyń konstıtýtsııalyq quqyqtaryn qamtamasyz etýdegi qyzmeti qaraldy.