Qazaqstanda eńbek etken EAEO elderiniń azamattary zeınetke neshe jastan shyǵady
Jyl basynan beri Eýrazııalyq ekonomıkalyq odaqqa múshe memleketterdiń eńbekshilerin zeınetaqymen qamsyzdandyrý týraly kelisim kúshine endi. Bul kelisim EAEO-ǵa múshe árbir memleket EAEO-ǵa múshe basqa memleketterdiń azamattaryna zeınetaqymen qamsyzdandyrýǵa arnalǵan quqyqtardy óz azamattaryna beriletin quqyqtar kólemimen birdeı etip berýge kepildik beredi. ıAǵnı, EAEO-ǵa múshe árbir memleket eńbekshilerdiń óz aýmaǵynda 2021 jylǵy 1 qańtardan keıin jınaǵan jumys ótili úshin óz zańnamasy boıynsha zeınetaqy tóleıdi.
Osy kelisimdi bizdiń eldiń aýmaǵynda iske asyrýǵa jaýapty BJZQ-nyń resmı saıtynda «frılanserlerge» qatysty zań talaptaryn túsindirgen aqparat jarııalandy.
«EAEO-ǵa múshe elderdiń «qashyqtan» jumys isteıtin azamattaryn tartqan jumys berýshi jarnalardy aı saıyn tóleýge mindetti. BJZQ-ǵa aýdarylatyn mindetti zeınetaqy jarnalarynyń mólsheri eńbekkerdiń aı saıynǵy tabysynyń 10% quraıdy, biraq Qazaqstandaǵy eń tómengi jalaqynyń 50 eselengen mólsherinen aspaýy kerek», - dep jazylǵan resmı túsindirmede.
Maqalada EAEO-ǵa múshe elder azamatynyń Qazaqstanda jumys istegen kezeńinde jınaǵan zeınetaqysyn qajetti qujattardy usynǵan kezde muraǵa qaldyrýǵa bolatyny da aıtylǵan.
«Qazaqstan Respýblıkasynyń zeınetaqy zańnamasynyń normalaryna sáıkes, EAEO elderiniń azamattary úshin bul quqyq jalpyǵa birdeı belgilengen zeınetkerlik jas bastalǵan kezde (erler – 63 jas, áıelder – 2021 jyly 60 jas, áıelderdiń zeınetkerlik jasy jyl saıyn jarty jylǵa, 2027 jyly 63 jasqa tolǵanǵa deıin ulǵaıa beredi) beriledi», - delingen BJZQ málimetinde.