Qazaqstanda eńbek daýlary 3 esege azaıdy

NUR-SULTAN. QazAqparat – Eńbek jáne halyqty áleýmettik qorǵaý mınıstri Birjan Nurymbetov ujymdyq eńbek daýlaryn aldyn alý jumystary qalaı júrgizilip jatqanyn aıtyp berdi, dep habarlaıdy QazAqparat tilshisi.

«Bul jumys Úkimet bekitken áleýmettik shıelenisterdi boldyrmaý jónindegi keshendi jospar aıasynda júrgizilýde. Eńbek táýekelderi sheńberinde monıtorıngileý 170 myń jumyskeri bar 359 problemalyq kásiporyndy qamtdy. Bul rette joǵarǵy táýekel aımaǵynda Nur-Sultan qalasy, Mańǵystaý, Aqtóbe jáne Atyraý oblystary bar. Sońǵy jyldary eńbek daýlary 3 esege tómendedi. Bıylǵy jyldyń basynan beri respýblıka boıynsha 9 eńbek qaqtyǵysy oryn aldy. Olardyń jeteýi – elimizdiń Batys óńirlerinde sheteldikterdiń qatysýymen munaı-gaz jáne munaı-servıstik kásiporyndarda boldy», - dedi Birjan Nurymbetov Úkimet otyrysynda.

Mınıstr atap ótkendeı, narazylyqtyń basty sebepteri – jumyskerlerdiń eńbekaqysy, jergilikti jáne sheteldik jumyskerlerge qatysty eńbek pen turmystyq jaǵdaılardyń teńsizdigi.

«Eńbek janjaldarynyń aldyn alýdyń mańyzdy quraldarynyń biri – jumys berýshi men jumysshylar arasyndaǵy ózara qarym-qatynasty retteýge múmkindik beretin ujymdyq shart jasasý dep sanaımyz. Búgingi kúni iri jáne orta kásiporyndardyń 97 paıyzy ujymdyq sharttarmen qamtylýyna qaramastan eńbek janjaldarynyń paıda bolýy – sol qujattardyń sapasynyń tómendigin kórsetedi. Bul turǵyda jumyskerlerdiń birlestigi, kásipodaqtar belsendilik tanytýy tıis dep sanaımyz», - dedi ol.

Eske sala ketsek, Úkimet basshysy jalaqyny bermeýdiń jumys berýshi úshin tıimsiz bolatyndaı etip zańnama normalaryn kúsheıtýdi tapsyrdy.