Qazaqstanda eń jaıly stýdenttik jataqhanalardyń reıtıngi jasalady

NUR-SULTAN. QazAqparat - Jastar jyly sheńberinde elimizde stýdent jastardyń jataqhanadaǵy jaǵdaıyn qadaǵalaýǵa arnalǵan «Stýdentter úıi 2.0» jobasy iske asyrylady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda belgili boldy, dep habarlaıdy QazAqparat tilshisi.

Jastar jyly sheńberinde «Qazaqstan stýdentteriniń alıansy» respýblıkalyq stýdenttik qozǵalysy Aqparat jáne qoǵamdyq damý mınıstrliginiń jáne Azamattyq bastamalardy qoldaý ortalyǵynyń qoldaýymen «Stýdentter úıi 2.0» jobasyn iske qosyp otyr. Bul aktsııa 2005 jyldan beri ótkizilip kele jatqanyn aıta ketý kerek. Al memlekettiń qoldaýymen aktsııa bıyl jańa respýblıkalyq aýqymǵa ıe bolmaq. Joba stýdentterdiń ómir sapasyn tolyqqandy jetildirýge baǵyttalǵan. Onyń basty maqsaty - jataqhanalarda turatyn stýdentterdiń qoǵamdaǵy belsendiligin arttyrý, azamattyq róli men jaýapkershiligin damytý, qoǵam ıgiligine stýdentterdiń tulǵalyq jáne ıntellektýaldyq, potentsıaldyq múmkindikterin damytýǵa jaǵdaı jasaý.

«Tuńǵysh Prezıdent - Elbasy Nursultan Nazarbaev «Bes áleýmettik bastama» aıasynda joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý jóninde tıisti tapsyrma bergen bolatyn. Statıstıkalyq málimetterge súıensek, elimizdegi 124 joǵary oqý ornynda 542 myń stýdent bilim alýda. Ol stýdentterge arnalǵan 251 jataqhanada 82 myń stýdent turyp jatyr. Sondaı-aq, elimizde 769 kolledjde 229 myń stýdent bilim alyp, onyń 46 myńnan astamy 439 jataqhanada turady. Qazirgi tańda elimizdiń stýdentter jataqhanasy máselesi áli kúnge deıin mańyzdy bolyp turǵany belgili», - dedi Aqparat jáne qoǵamdyq damý mınıstrliginiń Jastar jáne otbasy isteri komıteti tóraǵasynyń orynbasary Shahmardan Baımanov.

Ol óz sózinde Elbasynyń tapsyrmasymen 2022 jylǵa deıin 75 myń orny bar jataqhanalardy salý tapsyrylǵanyn atap ótti.

«Aktsııanyń basty maqsaty - jataqhanalardyń memlekettik standartqa, sanıtarlyq normalarǵa saı bolýyn qadaǵalaý, sapasyn arttyrý, stýdentterge qoıylatyn turmystyq tehnıkalardyń isten shyqpaýyn baqylaý, jańa oqý jylyna ázirligin baqylaý. Qyrkúıekte úlken reıtıng jasalady. Jaıly jáne nashar jataqhanalar saraptalady. Áleýmettik jelide de osy jobanyń úlken qoldaý tabaryna senemin. Sebebi, stýdentter osy aktsııaǵa tikeleı qatysady. Qazaqstan stýdentteriniń alıansy da arnaıy monıtorıngtik top quryp, jergilikti jerdegi kolledj, JOO stýdentteriniń jataqhanadaǵy jaǵdaıyn tekseredi. Birlesken joba bolǵannan keıin osy aktsııa arqyly stýdentterge jaıdy jaǵdaı jasaýdy kózdeımiz», - dedi Shahmardan Baımanov.