Qazaqstanda elektrondy úkimet boıynsha praktıkter alıansy qurylady

ASTANA. QazAqparat - Astana memlekettik qyzmet haby men Almaty Management University birlese otyryp, Estonııa elektrondy basqarý akademııasynyń qoldaýymen «Elektrondy úkimetti damytý: tájirıbe, máseleler jáne perspektıvalar» atty semınar ótkizdi, dep habarlaıdy QazAqparat sharany uıymdastyrýshylar taratqan málimetterge súıene otyryp.

Semınar Qazaqstannyń ár aımaǵynan kelgen ákimshilik ókilderin, memlekettik basqarý salasyndaǵy, onyń ishinde Hab elderi sarapshylarynyń basyn qosty.

Astana memlekettik qyzmet haby basqarýshy komıtetiniń tóraǵasy Alıhan Baımenov, Almaty Management University rektory Gýlmıra Qurǵanbaeva jáne Estonııa elektrondy basqarý Akademııasy dırektorynyń orynbasary Hannes Astok qatysýshylarǵa jyly lebizderin bildirdi.

Habtyń basqarý komıtetiniń tóraǵasy Alıhan Báımenov: «Áriptestik pen ózara tıimdi halyqaralyq yntymaqtastyq - kez-kelgen reformanyń tabystylyǵy men turaqtylyǵynyń sheshýshi faktorlarynyń biri. Hab qurylǵannan beri qatysýshy elder arasynda erikti ári ashyq bilim men tájirıbe almasý isin alǵa ilgerletýde», - dedi.

Almaty Management University rektory Gúlmıra Kurǵanbaeva «Tıimdi ári ashyq basqarýdyń quraly - elektrondy úkimetti damytýǵa qatysý eń aldymen, kásipkerlik ýnıversıtet retinde Almaty Management University úshin mańyzdy. Memlekettik basqarýdyń mundaı júıesin tek bıznes sektory, joǵary oqý oryndary jáne qoǵammen yntymaqtasa otyryp qurýǵa bolady. Praktıkter Alıansy - álemniń ártúrli elderinde elektrondy úkimet júıesin jasaýda mańyzdy tásil», - dedi rektor.

Semınar barysynda Habtyń qatysýshy elderi - Estonııa, Qazaqstan, Ózbekstan, Qyrǵyzstan, Grýzııa, Armenııa jáne Ázerbaıjannyń elektrondy úkimet boıynsha tájirıbesi tanystyryldy. Qazirgi tańda memlekettik qyzmetterdiń 99 paıyzy elektrondy formatta berilip, ortaq málimetter qoryna jınaqtalǵan, sol arqyly azamattardyń úkimetke degen senimin arttyra bilgen Estonııanyń tabysty tájirıbesi jaıly Hannes Astok baıandady. Júıeniń ıkemdiligi, sarapshynyń aıtýynsha, ashyqtyq pen qol jetimdilikti qamtamasyz etedi, sonymen qatar jańa múmkindikter berip, ákimshilik shyǵyndardy azaıtady.

Semınar qatysýshylary, sonymen birge, elektrondy úkimetti damytý perspektıvalaryn jáne osy baǵytta Ortalyq Azııa men Kavkaz elderinde zertteýler jasaý máselelerin talqylady.

Semınar barysynda elektrondy úkimetti damytý boıynsha praktıkter Alıansyn qurý mehanızmderi qarastyryldy. «Teń teńimen» qaǵıdaty boıynsha jumys isteıtin praktıkter Alıansy Ekonomıkalyq yntymaqtastyq jáne damý uıymy (EYDU) negizindegi 60-tan astam memleketti jumyldyratyn Tıimdi ınstıtýttar tuǵyrnamasy (EIP) tásilimen qurylady.

Buǵan deıin Hab tuǵyrnamasynda qatysýshy elder praktıkteriniń halyqqa memlekettik qyzmet kórsetý boıynsha Alıansy qurylǵan. Sony nátıjesinde Hab Grýzııa, Ázerbaıjan, Qazaqstannyń tájirıbelerin kórsetetin saraptamalyq materıaldar - keıs-stadıler daıarlanǵan.

Astanadaǵy memlekettik qyzmet haby - aımaqtaǵy memlekettik qyzmet salasyndaǵy tájirıbe men bilim almasýdyń ınstıtýtsıonaldy alańy. Qazirgi tańda Habtyń qatysýshy elderi qatarynda 38 memleket, onyń ishinde Amerıka, EO, TMD, Kavkaz jáne ASEAN elderi bar.