Qazaqstanda elektrondy tólem jasaǵandarǵa aqshanyń bir bóligi qaıtarylmaq

ASTANA. QazAqparat - QR Ulttyq ekonomıka vıtse-mınıstri Baýyrjan Bekeshev elektrondy saýda qyzmetin retteý boıynsha josparlanǵan ózgerister týraly aıtyp berdi, dep habarlaıdy QazAqparat tilshisi.

Atap aıtqanda, «durys» tólemderdi yntalandyryp, tranzaktsııalardyń ashyqtyǵyn arttyrý maqsatynda mınıstrlik satyp alýshylarǵa belgili bir protsentti qaıtarýdy usynyp otyr.

«Biz cash-back tásilin qoldanýdy usynamyz. Elektrondy túrde tranzaktsııa jasaǵan adamdarǵa QQS-tan (qosymsha qun salyǵy) nemese satyp alý qunynan belgili bir protsenttiń qaıtarylǵanyn qalaımyz. Memlekettik kirister komıtetimen ýaǵdalastyq boıynsha bul jobany Astananyń kommýnaldyq naryǵynda júzege asyryp kórgimiz keledi. Baqylaý-kassalyq apparattaryn qoldaný mindettelgen», - dedi Baýyrjan Bekeshev vedomstvoaralyq komıssııa otyrysynda.

Onyń aıtýynsha, árbir qazaqstandyq chek talap etýi tıis jáne barlyq saýda kásiporyndary baqylaý-kassalyq apparatyn qoldanýy qajet.

«Satyp alýshylardyń elektrondy saýdaǵa yntasyn arttyrý úshin osyndaı ádisti engizgimiz keledi. Baqylaý-kassalyq apparatynan, onlaın-tranzaktsııadan ótken satyp alý somasynyń bir bóligi qaıtarylady. Biryńǵaı tólem júıesi eshqandaı bankke júginbeı-aq, tranzaktsııalar men tólemderdi júzege asyrýǵa múmkindik beredi. Oǵan barlyq bank tirkeledi jáne kez kelgen ýaqytta biryńǵaı júıe arqyly tólem jasaýǵa bolady. Munyń barlyǵy sizdiń bıznes-sáıkestendirý nómirińiz nemese tulǵalyq esepshotyńyz boıynsha esepke alynady», - dedi Bekeshev.

Sonymen birge, vıtse-mınıstr Ulttyq banktiń biryńǵaı tólem júıesiniń mobıldik qosymshasyn ázirlep jatqanyn eske saldy.

«Biz adamı faktordy barynsha azaıtýǵa tyrysamyz. Barlyǵy bul tujyrymdamany qalaı ázirleıtinimizge jáne onymen jumys isteıtin adamdarǵa baılanysty», - dep tolyqtyrdy sózin mınıstr basshysynyń orynbasary.