Qazaqstanda elektrondy saýdany qalaı damytý qajet - Amazon-nyń keńesi

ASTANA. QazAqparat - Amazon-nyń bas menedjeri Tonı Van Den Berg Qazaqstanda elektrondy saýda-sattyqty damytý boıynsha keńes berdi, dep xabarlaıdy QazAqparat tilshisi.

«Eń aldymen kıberqaýipsizdikti qolǵa alý qajet. Kıberqaýipsizdik bolmasa, senim bolmaıdy. Al senim bolmasa, elektrondy saýdaǵa eshkim bet burmaıdy. Halyq ondaı qyzmetterdi paıdalanýǵa tartynady. Menińshe, elektrondy saýdany damytý úshin aldymen bultty texnologııalardy qolǵa alǵan jón. Al ashyq ınternet, bultty keńistik qolǵa alynsa, qaýipsizdik sharalaryn qatań saqtaý qajet», - dedi Van Den Berg xalyqaralyq sarapshylar keńesiniń otyrysynda.

Sarapshynyń aıtýynsha, elektrondy saýda-sattyqty uıymdastyrý úshin aqparattyq ınfraqurylymdy jasaý qajet. Ol úshin tutynýshydardyń jeke málimetterin paıdalanady. «Degenmen, málimetterdiń birneshe túri bar. Jalpyǵa ortaq málimetterdi ashyq paıdalanýǵa bolady. Ondaı málimetterdi Qazaqstannan tys jerge ketse de, eshteńe etpeıdi. Jartylaı qupııa málimetterdi de paıdalanýǵa múmkindik bar. Biraq ony shıfrge salý qajet. Bul jerde kıberqaýipsizdikti kúsheıtý kerek. Sosyn qupııa málimetter bar. Ony eldiń ishinde ǵana saqtaý kerek», - dep atap kórsetti Tonı Van Den Berg.

Onyń sózine qaraǵanda, elektrondy saýdany damytý úshin keden men salyq rásimderin de barynsha jeńildetken abzal. Sebebi taýarlar shekarada uzaq turyp qalsa, tutynýshynyń elektrondy saýdaǵa degen senimi tómendeıdi.

Aıta keteıik, búgin Astana ekonomıkalyq forýmy aıasynda Tsıfrlandyrý jónindegi xalyqaralyq sarapshylar keńesiniń otyrysy ótti.