Qazaqstanda elektrondy keden jumysyn bastady

ASTANA. QazAqparat - 2018 jyldyń 1 sáýirinen bastap QR Qarjy mınıstrliginiń Memlekettik kirister komıteti engizgen kedendik deklaratsııalaýdyń barlyq tártipteri tájirıbeli túrde paıdalaný júıesine engizildi. Bul BUU-nyń Saýda jáne damý jónindegi konferentsııasynyń (UNCTAD) qoldaýymen júrgizilýde, dep habarlaıdy «QazAqparat» HAA tilshisi.

Qarjy mınıstrliginiń baspasóz qyzmetiniń habarlaýynsha, ASYCUDA World platformasynyń mańyzdy nusqasy sanalatyn UNCTAD bazasynda jasalǵan, QR QM MKK-ge engizilgen salyq salý jáne keden ákimshiliginiń «ASTANA-1» avtomattandyrylǵan júıesi keden protsedýralaryn ońtaılandyryp, QR-daǵy syrtyq ekonomıkaǵa qatysýshylardyń ákimshilik turǵyda jáne ýaqyt boıynsha shyǵynyn qysqartady.

«ASTANA-1 júıesi barlyq kedendik potsedýralar men operatsııalardy qamtyp, QR QM MKK-degi salyq bazasynyń málimetterimen ıntegratsııalanýǵa, sonymen birge QR-nyń ózge de memlekettik organdarymen aqparattyq turǵyda birlese jumys isteýge múmkindik beredi», - dep túsindiredi Qarjy mınıstrliginiń baspasóz qyzmetinen.

Atalyp otyrǵandaı, rásimdeý protsesi - taýardy kirgizýden tazartýǵa deıingi sharýa «ASTANA-1» júıesinde júzege asyrylǵan. Bul óz kezeginde syrtqy ekonomıka qatysýshylaryna biryńǵaı aqparattyq platformada bola otyryp, kez kelgen operatsııany - aldyn ala aqparat berýden - shyǵarylatyn taýardy baqylaýǵa deıingi sharýany oryndaýǵa jol ashady. Atalǵan jumys málimetterdiń aınalymyn tezdetedi.

Deklaratsııany toltyrý protsedýrasy boıynsha deklaranttar men keden ókilderiniń máselelerin memlekettik kirister organynyń mamandary keıingi mindetti keńes berý baǵytymen «on-line» tártipte qaraıdy.

«ASTANA-1» aqparattyq júıesiniń birqatar artyqshylyqtary men barlyq keden protsesterin avtomatty baqylaý arqyly júzege asyrý múmkindikteri bar. Táýekelderdiń joq bolýymen birge «ASTANA-1» AJ taýarlarǵa deklaratsııany avtomatty túrde shyǵarady. Burynǵy júıemen búginginiń aıyrmashylyǵyn mynadan da baıqaýǵa bolady: júıe qoldanýshylarǵa tegin qyzmet etedi. Buǵan qosa deklarant barlyq keden operatsııalaryn keńseden ketpeı-aq atqara alady. Tek Internet bolsa bolǵany. Artyqshylyqtardyń taǵy biri - aldyn ala aqparatty jasaý múmkindigi keıin tranzıttik deklaratsııaǵa aınalady. Taýar belgilengen pýnktke jetkizilgennen keıin ol elektrondy saqtaý qujatyn jasaýda esepke alynyp, óz kezeginde avtomatty túrde taýardyń deklaratsııasyn jasaýǵa qoldanyla beredi», - delingen vedomstvonyń habarlamasynda.