Qazaqstanda elektr samokatpen júretinderden júrgizýshi kýáligi talap etile me
Búgin elordada ótken baspasóz máslıhatynda tilshiler J.Muratálıevten jyldamdyǵy saǵatyna 25 shaqyrymnan asatyn elektr samokattaryn basqaratyn adamdardan júrgizýshi kýáligin talap etý múmkindigine qatysty suraq qoıdy.
«Olarǵa júrgizýshi kýáligi kerek emes. Sebebi velosıpedpen júretinderden de osyndaı qujatty talap etpeımiz. Elektr samokat standartyn engizgennen keıin, biz jol erejesinde de tıisti ózgeristerdi eskeremiz. Onda samokatpen qaı jerde júrgýge bolatynyn, balalar qaı jastan bastap ony basqara alatynyn belgileımiz. Elektr samokattarynyń sany kúrt artýyna oraı laıyqty joldar da salyna bastaıdy», - dedi komıtet basshysynyń orynbasary.
Onyń aıtýynsha, avtokólik joldarynyń oń jaq jıeginde elektr samokattarymen 14 jasqa tolǵan balalarǵa júrýge ruqsat berilýi múmkin.
«Avtólik júrgizýshileri de elektr samokatpen júretin adamdardyń qaýipsizdigin nazarǵa alýy kerek. 14 jasqa tolmaǵan balanyń elektr samokatpen avtokólik joldaryna shyǵýyna ruqsat bermeımiz. Mundaı derekter tirkelse, polıtsııa shara qoldanady. 14 jasqa tolmaǵan bala saıabaq ishinde, kóshege shyqpaıtyn oryndarda júre alady», - dedi komıtet basshysynyń orynbasary.
Budan buryn habarlanǵandaı, Qazaqstanda elektr samokattardy paıdalanýdyń ulttyq standartynyń jobasy ázirlendi.
Atalǵan standart samokattardyń jyldamdyǵy men basqa da qaýipsizdik talaptaryna sáıkestigin retteıdi. Osy oraıda bul qurylǵylarda mindetti túrde jaryq shamdarynyń bolýy sııaqty talaptar eskeriledi. Osy standarttyń aıasyna jyldamdyǵy saǵatyna 25 shaqyrymnan aspaıtyn elektr samokattary qamtylady.
Jandos Muratálıev jyl saıyn elektr samokattaryna qatysty jol-kólik oqıǵalarynyń sany artyp kele jatqanyn aıtty.
Sonymen qatar ol samokattardyń jaıaý júrginshiler jolaǵymen qozǵalǵanyna qarsy ekenin aıtty.