Qazaqstanda elektr kólikterine suranys tym az - «Qazavtoóndiris» basshysy
«Qazavtoóndiris» Qazaqstan avtomobıl salasy kásiporyndary odaǵynyń» basqarma tóraǵasy Oleg Alferovtiń aıtýynsha, bul úrdiske elektr kólikteriniń qymbat baǵasy sebep bolyp tur, dep habarlaıdy «QazAqparat» HAA tilshisi.
«Ózderińiz biletindeı, kólikterdiń alternatıvti túrlerin qurastyryp jatqan keıbir memleketter elektr kólikterin qurastyrýǵa basa mańyz berip jatyr. Búgingi tańda Qazaqstandaǵy jaýapty mınıstrlik elektr kólikteriniń qýatyn toltyratyn beketterdiń salynýyn qolǵa ala bastady. Biraq, qazirgi tańda qazaqstandyqtardyń elektr kólikterine suranystary tym az. Bıylǵy jyldyń birinshi jartyjyldyǵynyń qorytyndysy boıynsha bar-joǵy 19 elektr kóligi satyldy. Satylyp alynǵan elektr kólikteriniń basym bóligi - «Tesla» avtokólikteri. Elektr kólikteriniń jappaı suranysqa ıe bolýynyń birden-bir kedergisi - kólikterdiń qymbattyǵy», - deıdi Oleg Alferov.
Basqarma tóraǵasynyń aıtýynsha, elektr kóligin qurastyrýdy qolǵa alǵan Soltústik Eýropa memleketteriniń, AQSh, Qytaı elderiniń tájirıbesi memleket tarapynan sýbsıdııa kerektigin kórsetken. Danııa nemese Gonkong naryǵyndaǵy jaqynda qalyptasqan ahýal bul salanyń damýy qanshalyqty memlekettik sýbsıdııaǵa táýeldi bolatynyn anyqtap bergen kórinedi.
«Soǵan qaramastan, qazaqstandyq avtokólik óndirýshiler Óskemen jáne Qostanaı qalalarynda 2014 jyldan beri elektr kóligin shyǵarýdy qolǵa alǵan. Álbette, elektr kóligi dástúrli kólik óndirý salasyn almastyrýdyń jalǵyz joly emes, sýtegi otyny arqyly júretin kólikterge álemdik elder mańyz berip keledi. Biraq, búgingi qazaqstandyq naryqqa turmystyq rozetka arqyly qosylatyn gıbrıdti avtokólikter qyzyqty. Bul avtokólikterdiń baǵasy elektr kóliginen góri áldeqalaı arzanyraq. Bizge qazaqstandyq avtoóndirýshiler óz kásiporyndarynda gıbrıdti avtokólikterdi óndirýge qyzyǵýshylyq tanytyp jatqanyn habarlady», - deıdi Oleg Alferov.