Qazaqstanda elektr energııasyna tarıfterdi saralaýdy joıý usynyldy

NUR-SULTAN. QazAqparat – QR Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov elektr energııasyn kóterme jáne bólshek saýdada ótkizý naryqtarynda básekelestikti damytý qadamdaryn aıtty, dep habarlaıdy QazAqparat tilshisi.

«Bul baǵytta ne usynylady? Kásipkerlikti damytý jónindegi ulttyq jobada 2025 jylǵa qaraı 30%-ǵa deıingi kólemde ortalyqtandyrylǵan saýda-sattyqqa kóshý kózdelgen. Bul jańa jabdyqtaý uıymdarynyń paıda bolýyn jáne stantsııa resýrstaryna qol jetkizý esebinen tiginen ıntegratsııalanǵan kompanııalardyń óńirlik naryqtarǵa ózara kirýin qamtamasyz etedi. Basqa másele – ol tarıfterdi ustap turý saıasaty olardy saralaýdyń artýyna ákeldi. Retteýshi negizgi áleýmettik júktemeni shaǵyn jáne orta bızneske júktedi, sebebi iri bıznes tikeleı jumys isteıdi. Bıýdjettik uıymdar úshin tarıfter arqyly bıýdjet úlken shyǵyndardy kóteredi. Tarıfterdi saralaýdy joıý jabdyqtaýshy kompanııalar arasyndaǵy básekelestik úshin mindetti shart qana emes, sonymen qatar halyqtyń áleýmettik osal sanattaryn qoldaý deńgeıin, onyń ataýlylyǵyn arttyrý bolyp sanalady», - dedi R. Ahmetov Ortalyq kommýnıkatsııalar qyzmetinde.

Onyń aıtýynsha, naryqty monopolııasyzdandyrý boıynsha sharalar qajet. Bul - retteletin naryq kólemin kezeń-kezeńimen tómendete otyryp, ortalyqtandyrylǵan saýda-sattyq kóleminiń ulǵaıýy. Bıýdjetke túsetin júktemeni azaıtý esebinen ataýly áleýmettik kómek mólsherin ulǵaıta otyryp, tarıfterdi saralaýdy joıý eskerilýi kerek.

«Sondaı-aq baǵalardy salystyrýdy jáne sharttar jasasýdy qamtamasyz etetin jelilik platformalardy damyta otyryp, elektr energııasyn jetkizýshilerdi aýystyrý tetigin qurý jónindegi is-sharalar keshenin iske asyrý mańyzdy», - dedi agenttik ókili.

Buǵan deıin R. Ahmetov elimizdegi elektr energııasy naryǵyndaǵy kemshilikterdi ataǵan bolatyn.