Qazaqstanda eldi mekenderge taqaý qoımalardan 20 myń tonnadan astam oq-dári shyǵaryldy
«Memleket basshysynyń tapsyrmasyn oryndaý maqsatynda Arystan shamamen 20 myń tonnaǵa jýyq oq-dári shyǵaryldy. Al ózge eldi mekenderde ornalasqan qoımalardan 750 tonnadan astam iri kalıbrli oq-dáriler shyǵarylǵan bolatyn. Bul halyqtyń qaýipsizdigin qamtamasyz etý maqsatynda jasaldy», - dedi Qorǵanys mınıstriniń orynbasary.
Onyń atap ótýinshe, Arysta tótenshe oqıǵa oryn alǵannan keıin Qorǵanys mınıstrliginiń buıryǵymen elimizdiń barlyq óńirlerindegi qoımalarǵa 1 aı boıy tekserý júrgizildi. Mundaı tekserýler turaqty túrde ótkizilip keledi. Tekserý komıssııasynyń quramyna mol tájirıbesi bar bedeldi áskerı mamandar kiredi.
Atalǵan komıssııa tótenshe jaǵdaılar týyndaý táýekeline jan-jaqty baǵa berip, atys qarý-jaraqtary men oq-dáriler saqtalatyn barlyq nysandardyń qaýpisizdigin kúsheıtý boıynsha sharalar usyndy.
Esterińizge sala ketsek, 2019 jyldyń 24 maýsymynda Arys qalasyndaǵy áskerı bólimniń qoımasynda jarylys boldy. Apat saldarynan eki adam qaza tapty.