Qazaqstanda Elbasymen túsken sýretter baıqaýy jarııalandy
1 jeltoqsan - Tuńǵysh Prezıdent kúnine arnalǵan baıqaýǵa Elbasymen birge túsken fotolar ústimizdegi jyldyń 14-30 qarashasy aralyǵynda qabyldanady.
Baıqaý shartyna sáıkes, qatysýshy Elbasy N.Nazarbaevpen túsken sýretin óziniń Instagram paraqshasyna #ElbasyJaneMen heshtegimen jarııalaýy tıis. Sonymen qatar, Qoǵamdyq damý mınıstrliginiń @kdm.gov.kz jáne mınıstrlikke qarasty jastar jáne otbasy isteri komıtetiniń @kdms.gov, sondaı-aq, Astana qalasynyń qoǵamdyq damý jónindegi basqarmasynyń @qogamdyk_damy_astana atty Instagram paraqshalaryna tirkelip, óz paraqshasynda olardy belgileýi tıis.
«Qatysýshy Elbasymen túsken sýretin jarııalaýmen qatar, prezıdentpen kezdesýden alǵan áserin jazýy tıis. Múmkin Elbasymen kezdesýde qandaı da bir qyzyqty oqıǵa oryn alǵan bolar nemese kezdesý onyń ómiri men bolashaǵyna áser etken shyǵar. Áleýmettik jeli baıqaýyna elimizdiń kez kelgen azamaty jáne barlyq óńirden qatysa alady, sonymen qatar, jas ereksheligine eshqandaı shekteý joq»,- dedi QR Qoǵamdyq damý mınıstrligi jastar jáne otbasy isteri komıteti tóraǵasynyń mindetin atqarýshy Ashat Oralov.
Onyń aıtýynsha, atalǵan baıqaý Tuńǵysh Prezıdent kúnin atap ótýdi keńinen nasıhattaýda mańyzdy.
«Ekiniń birinde Elbasymen túsken sýret joq, ol kezde ne isteýge bolady?» degen suraqqa ol Prezıdent qatysqan sharalarda onymen top bolyp túsken foto ıeleri de baıqaýǵa qatysa alatynyn aıtty.
Kimniń sýreti kóp laık jınasa, sol adam júldeger atanady. Fotobaıqaý nátıjesi osy jyldyń 1 jeltoqsan kúni Astanadaǵy iri saýda ortalyqtarynyń birinde jarııalanady. Jeńimpazdarǵa Іphone x, Іpad jáne taǵy basqa baǵaly syılyqtar beriledi. Odan bólek, ádilqazy alqasynyń tańdaýymen úzdik degen 50 foto arnaıy kórme galereıasyna qoıylady.
Buǵan deıin habarlaǵanymyzdaı, búgin Astanada jas kóshbasshylardyń forýmy ótip, onda aldaǵy jastar jylyna arnalǵan sharalar men ıdeıalar talqylanǵan bolatyn.