Qazaqstanda ekologtardy daıyndaý reformasyn jedeldetý qajet - Álııa Nazarbaeva

NUR-SULTAN. QazAqparat - Qazaqstanda ekologtardy daıyndaý reformasyn jedeldetý qajet. Bul týraly búgin XII AEF aıasyndaǵy «Jasyl ósim úshin ınnovatsııalyq ekojúıeni qurý. Ǵylym, bilim jáne tehnologııa» sessııasynda Qazaqstannyń ekologııalyq uıymdary qaýymdastyǵy tóralqasynyń tóraǵasy Álııa Nazarbaeva aıtty, dep habarlaıdy QazAqparat tilshisi.

«Búgingi kúni bilim salasy mektepke tek pedagogıkalyq bilimi ǵana emes, sonymen birge ózin úlgi etý arqyly jigerlendirýge qabiletti, biliktiligi joǵary kadrlardy tartýdy qajet etetinin túsinemiz. Qazirgi ýaqytta Qoǵamdyq mańyzy bar bastamalardy damytý qory EACH jobasyn ázirlep jatyr. Bul gýmanıtarlyq pánderge basymdyq berilgen bizdiń ulttyq ónim degendi bildiredi. Onyń basty maqsaty - mektepterge biregeı kýrstar men oqý baǵdarlamalarynyń avtory bolatyn talantty, jas kadrlardyń jańa tolqynyn tartý», - dedi ol.

Onyń atap ótýinshe, bul jumystar qazirgi ýaqytta bastalyp ta ketken. Máselen, Qoǵamdyq mańyzy bar bastamalardy damytý qory halyqaralyq uıymdarmen, mınıstrliktermen, barlyq deńgeıdegi ákimdiktermen jáne azamattyq sektormen birlesip, birqatar shara uıymdastyrǵan. Atap aıtqanda, «Birge jaryǵyraq» festıvali elimizdiń 12 óńirinen shamamen 75 myń adamnyń basyn qosty. Al «Eko-Challenge» jobasy 82 myń bala men olardyń ata-analaryn biriktirdi.

«Bul bizdiń qoǵamymyzdyń, jastarymyzdyń, pedagogıkalyq qoǵamdastyqtyń, ata-analardyń «jasyl ósim» ıdeologııasyn ilgeriletýge múddeli ekeniniń jarqyn dáleli. Jastardyń energııasy men shyǵarmashylyǵyna tań qalamyn. Olar óte belsendi. Qorshaǵan ortany qorǵaý, energııa únemdeý jáne Qazaqstannyń qaıta óńdeý salasyn damytý syndy salalaryndaǵy ózekti máselelerdi sheshýge baǵyttalǵan óz kózqarasyn usynýdan qoryqpaıdy», - dedi Á.Nazarbaeva.

Álııa Nazarbaeva kásibı kadrlar daıarlaý júıesindegi sapaly reformalar protsesin jedeldetý qajettigin de atap ótti.

«Kásibı kadrlardy daıyndaý júıesindegi sapalyq reformalar protsesin jedeldetip, ekologııalyq qaýipsizdik pen laıyqty eńbek sharttaryn qurýǵa basymdyq bere otyryp, úkimet, jumys berýshi, eńbek bırjasy, sonymen qatar fılantroptardyń kelisilgen is-áreketin túzý qajet dep sanaımyn. Bul energııamen shıkizatty paıdalaný tıimdiligin arttyrýǵa, parnıkti gazdar shyǵaryndylaryn shekteýge, qorshaǵan ortaǵa qoqystar men las zattardyń shyǵýyn azaıtýǵa, ekojúıeni qorǵap, qalpyna keltirýge alyp keledi», - dedi ol.