Qazaqstanda ekologııalyq taza janarmaı óndirýge barlyq jaǵdaı bar — vıtse-mınıstr

<p>ALMATY. KAZINFORM &mdash; Almatyda ótip jatqan &laquo;Green Airports&raquo; aımaqtyq semınary aıasynda Qazaqstan Respýblıkasynyń Kólik vıtse-mınıstri Talǵat Lastaev ekologııalyq taza janarmaı óndirisi týraly aıtty.</p>

Vıtse-mınıstrdiń aıtýynsha, Qazaqstanda ushaqtarǵa arnalǵan ekologııalyq janarmaı óndirisin ashý úshin kelissózder júrgizilip jatyr.

— 2028 jyldan bastap Eýropalyq Odaq áýe keńistigine belgili bir kólemde ekologııalyq taza janarmaıdy qoldanatyn áýe kompanııalary ǵana kire alady. Osyǵan oraı, biz áýe kemeleriniń janarmaıyna qatysty ártúrli jobalardy qarastyryp jatyrmyz. Onyń ishinde «QazMunaıGaz-Aero» ekologııalyq taza janarmaı óndirý máselesimen aınalysýda. Ónerkásip orny halyqaralyq banktermen mundaı óndiristi ashý úshin kelissózder júrgizip jatyr, — dedi Talǵat Lastaev.

Sondaı-aq Kólik vıtse-mınıstri Qazaqstanda ekologııalyq janarmaı óndirýge barlyq jaǵdaı bar ekenin atap ótti.

— Ekologııalyq janarmaı dástúrli janarmaıǵa ekologııalyq qosyndylardy qosý arqyly jasalady. Onyń birneshe túri bar. Qazir olar elimizde engizý úshin zerttelip jatyr. Qazaqstanda ekologııalyq janarmaı jasaýǵa barlyq jaǵdaı bar. Sebebi bizde ózimizdiń janarmaı óndirisi bar. Biz aldaǵy ýaqytta halyqaralyq JetA1 standartyna kóshe bastaımyz jáne sonyń negizinde ekologııalyq janarmaı óndiremiz, — dedi ol.

Eske salaıyq, buǵan deıin Energetıka mınıstrligi aımaqtarda janarmaı qoryn tolyqtyrý boıynsha málimdeme jasaǵan bolatyn.