Qazaqstanda Ekinshi dúnıejúzilik soǵystyń qansha ardageri bar

NUR-SULTAN. QazAqparat – Jeńis kúni qarsańynda soǵys ardagerleri men tyl eńbekkerlerine qandaı áleýmettik kómek kórsetiledi? Bul týraly OKQ-da ótken baspasóz máslıhatynda QR Eńbek jáne halyqty áleýmettik qorǵaý vıtse-mınıstri Erlan Áýkenov aıtyp berdi, dep habarlaıdy QazAqparat tilshisi.

Onyń aıtýynsha Qazaqstanda qazirgi tańda Ekinshi dúnıejúzilik soǵystyń 1 025 ardageri bar.

«Eńbek jáne halyqty áleýmettik qorǵaý mınıstrligi Jeńiske úles qosqan azamattardyń bárine materıaldyq kómek berýdiń kepildendirilgen shegin bekitý týraly ákimdikterdiń barlyǵyna keńes bergen edi. Osynyń nátıjesinde UOS ardagerleri men múgedekterine 1 mln teńge kóleminde bir rettik materıaldyq kómek berildi», - dedi ol.

Vıtse-mınıstr, sonymen qatar, Lenıngrad qorshaýynda qalǵan turǵyndar men kontslagerlerdiń kámeletke tolmaǵan tutqyndaryna 50 myń teńgeden, al UOS-nyń qaıtys bolǵan ardagerleriniń jubaıyna, sonymen qatar soǵys jyldary eńbek etken tyl eńbekkerlerine 30 myń teńgeden beriletinin málim etti.

«Tólem barlyq aımaqta júrgiziledi. Jeti óńirde berilip te qoıdy. Olar: Aqtóbe, Atyraý, ShQO, Qaraǵandy, Qyzylorda oblystary men Nur-Sultan, Almaty qalalary. Basqa óńirlerde jaqyn arada bárine tabystalady», - dedi Erlan Áýkenov.

Eske sala ketsek buǵan deıin Memleket basshysy reseılik «Mır» arnasyna bergen suhbatynda bıyl Ekinshi dúnıejúzilik soǵys ardagerlerine 1 mln teńgeden beriletinin málim etken edi.