Qazaqstanda ekinshi deńgeıli 9 bank jabylýy múmkin

ASTANA. QazAqparat – Qazaqstanda jumys isteıtin ekinshi deńgeıli 9 bank jabylýy yqtımal. Bul týraly Qarjy naryǵyn retteý jáne damytý agenttigi ashyq talqyǵa shyǵarǵan Retteý saıasatynyń konsýltatıvtik qujat-jobasynda jazylǵan, dep habarlaıdy QazAqparat tilshisi.

«Qazirgi ýaqytta Qazaqstan naryǵynda ekinshi deńgeıli 21 bank jumys isteıdi. Onyń toǵyzyn jabý boıynsha jumys júrip jatyr. Byltyr agenttik ekinshi deńgeıli banktiń basshy laýazymyna taǵaıyndalmaq bolǵan 13 úmitkerdiń kandıdatýrasyn kelisýden bas tartty.

Al baǵaly qaǵazdar naryǵynda 49 sýbekt jumys isteıdi. 2022 jyly agenttik osyndaı uıymdardyń basshysy laýazymyna usynylǵan 10 kandıdatty kelisýden bas tartty», - dep kórsetilgen Ashyq NQA portalynda jarııalanǵan Retteý saıasatynyń konsýltatıvtik qujatynda.

Sonymen birge, byltyr qazaqstandyqtar tarapynan bank jáne mıkroqarjy sektoryndaǵy uıymdarynyń jumysyna qatysty 35 myńnan asa ótinish túsken.

Buǵan qosa, atalǵan konsýltatıvtik qujatta elimizde múmkindigi shekteýli azamattardyń qarjy qyzmetterine qoljetimdilik deńgeıi tómen ekeni jazylǵan.

Eske sala ketsek, buǵan deıin bank lıtsenzııasynan aıyrylsa, depozıttegi aqshany qalaı qaıtarýǵa bolatyny týraly aqparat jarııalaǵan edik.