Qazaqstanda eki kún ishinde 50-ge jýyq ınternet-alaıaqtyq faktileri anyqtaldy

NUR-SULTAN. QazAqparat - Qazaqstanda birneshe kún ishinde ınternet-paıdalanýshylarǵa qatysty 50-ge jýyq alaıaqtyq anyqtaldy. Bul jóninde Іshki ister mınıstrligine silteme jasap QazAqparat habarlaıdy.

Aqparattandyrý jáne baılanys salasyndaǵy quqyq buzýshylyqtardyń jolyn kesý jáne ashý, sondaı-aq erkin aınalymda tyıym salynǵan ónimderdi zańsyz daıarlaıtyn, kóbeıtetin jáne taratatyn adamdardy anyqtaý úshin «Anti-Fraud» jedel-profılaktıkalyq is-sharasy júrgizildi.

Eki kúndik operatsııa barysynda osyndaı 104 quqyq buzýshylyq, onyń ishinde ınternet-paıdalanýshylarǵa qatysty 46 alaıaqtyq, 18 avtorlyq jáne sabaqtas quqyqtardy buzý, aqparattandyrý jáne baılanys salasynda 13 quqyq buzýshylyq, 12 ІT-tehnologııalardy paıdalana otyryp jasalǵan urlyq, 9 pornografııa taratý jáne arnaıy tehnıkalyq quraldardardy taratýdyń 6 faktisi anyqtaldy.

Erkin aınalymda tyıym salynǵan myńnan asa ónim alyndy, operatsııaǵa daıarlyq barysynda 140 buryn jasalǵan ınternet-alaıaqtyq ashyldy.

Máselen, Almaty qalasynda Jambyl oblysynyń týmasy ustaldy. Ol saýda ınternet-alańdarynda avtobólshekterdi satý jáne jetkizý týraly jalǵan jarnamalar ornalastyryp, aqshany banktik kartochkalarmen alyp, keıin jarnamany óshirip tastaǵan jáne abonenttik nómirin ajyratqan. Qazirgi ýaqytta oǵan qatysty alaıaqtyqtyń osyndaı 10-nan asa faktisi dáleldendi.

Sońǵy jyldary Internet jelisin alaıaqtyq maqsatynda paıdalana otyryp jasalatyn quqyq buzý faktileri ósýde. Adamdardy aldaý úshin alaıaqtar áleýmettik jelilerdi, saýda ınternet-alańdaryn paıdalanady, jalǵan ınternet-dúkender, «feık» paraqshalar jáne saıttar ashady.

Osyǵan baılanysty, ІІM qaýipsizdik sharalaryn eske salady:

- qupııa sózderdi únemi aýystyryp otyryńyzdar, olar kúrdeli bolýy tıis;

- tólem júıelerindegi barlyq qaýipsizdik júıelerin qosyńyzdar: SMS rastaý, ІR-mekenjaılardy qadaǵalaý, 3D-secure jáne basqa;

- kartany qaraýsyz qaldyrmańyzdar, óz derekterińizdi eshkimge barmeńizder, óıtkeni plastık kartadan aqshalaı qarajat alý úshin kartanyń nómirin jáne CVV-kodyn (kartanyń artyndaǵy sońǵy úsh san) bilgen jetkilikti;

- Kartany mobıldi bank qyzmetine qosyńyz.

Bankter jáne tólem júıeleri eshqashan hat joldamaıdy jáne olardyń qyzmetkerleri óz klıentterine olardyń shottarynyń derekterin joldaý týraly ótinishpen qońyraý shalmaıtynyn este saqtaý qajet.