Qazaqstanda eGov mobile mobıldi qosymshasyn aı saıyn 4 mln-nan astam adam paıdalanady – Baǵdat Mýsın

<p>ALMATY. KAZINFORM &ndash; Qazaqstanda elektrondy úkimetti engizý kórsetkishi jyldan jylǵa artyp keledi, bul rette 2023 jyly onlaın rejımde 50 mln qyzmet kórsetildi, qyzmetterdiń 92%-y azamattarǵa úıden shyqpaı-aq qoljetimdi boldy. Bul týraly Digital Almaty 2024 forýmynyń paneldik sessııasynda Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty.</p>

Mınıstrdiń aıtýynsha, proaktıvti qyzmetterdi júzege asyrý boıynsha jumystar únemi júrgizilip keledi, qazirgi ýaqytta mundaı qyzmetterdiń 46 túri bar jáne olar 2 mln-nan astam ret kórsetilgen.

«Qazir bizde elektrondyq úkimettiń orasan zor ekojúıesi qalyptasty, oǵan memlekettik portaldarmen qatar, banktik qosymshalar enip, basqa da servıster men startaptar kire bastady. Biz memleket retinde ónimder men qyzmetterdi qurýǵa arnalǵan kóptegen qural túrin usynamyz. Govtech boıynsha kóshbasshylardyń biri retinde biz óz quzyretterimizben, tipti daıyn ónimderimizben bólisý jaýapkershiligine ıemiz. Máselen, 2023 jyly Tájikstan Respýblıkasyna 3 júıe berildi. Olar – CPU, Smart Bridge, GOV.kz. Biz tabysty jáne dáleldengen ónimderdi seriktes elderimizge qaıtarymsyz usynamyz», – dedi Baǵdat Mýsın.

Ol sondaı-aq óz sózinde eń tanymal 45 servıs pen memlekettik qyzmet qazaqstandyqtarǵa ekinshi deńgeıli bankterdiń qosymshalary arqyly qoljetimdi ekenin atap ótti. Máselen, olardyń ishindegi eń tanymaldary – avtokólikti onlaın satý. Bul rette eger buryn mámilelerdiń shamamen 10%-y onlaın ótse, memlekettik qyzmetke reınjınırıng júrgizilip, ony bankterdiń qosymshalaryna shyǵarǵan soń onlaın satylymdardyń úlesi 75%-ǵa deıin ósti.

«Mundaı jetistikterge Qazaqstannyń elektrondyq úkimetiniń negizgi komponentteri nátıjesinde qol jetkizildi. Olar – Smart Bridge ıntegratsııalyq platformasy (bızneske jańa ónimder men servıster qurýǵa múmkindik beretin memlekettik servısterge bıznesti 1700-den astam qosý), Smart Data Ukimet (derekterdi aıqas taldaý jáne basqarý sheshimderin qabyldaýdy qoldaýǵa arnalǵan keńistik), GOV.kz (elimizdiń biregeılengen standart boıynsha jumys isteıtin barlyq memlekettik organdary saıttarynyń biryńǵaı platformasy), E-notarıat (tsıfrlyq notarıat), E-ótinish (halyq únine qulaq asatyn memlekettiń qaǵıdattary), E-densaýlyq (óz medıtsınalyq derekterine qol jetkizý) jáne E-salyq (salyq ámııany)», - dedi Baǵdat Mýsın.

Atalǵan qyzmetterdiń barlyǵy Egov superapp-ta qoljetimdi. Ol 850 servıs, qaǵaz nusqany almastyratyn 31 tsıfrlyq qujat, memlekettik servısterdiń marketpleısi. 

«Bularǵa tolyǵymen onlaın kórsetiletin notarıattyq qyzmetterdi jáne salyq ámııanyn, túımesheni birneshe ret basý arqyly memlekettik organdarǵa ótinish berý qyzmetterin jatqyzýǵa bolady. Qazaqstanda eGov mobile mobıldi qosymshasyn aı saıyn 4 mln-nan astam adam paıdalanady. Endi biz qoldanystaǵy barlyq komponentti biryńǵaı GovTech platformasyna – KazTech-ke biriktiremiz, onda biz qazirdiń ózinde ashyq reglamentter men erejelerdi engizemiz. Bizdiń baǵalaýymyz boıynsha, ár jobada ortasha alǵanda, shamamen 40% uqsas protsester men talaptardy avtomattandyrý bar»,– dep qorytyndylady sózin Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın.