Qazaqstanda eGov arqyly 50 mln-nan astam memlekettik qyzmet kórsetildi

NUR-SULTAN. QazAqparat – «Ulttyq aqparattyq tehnologııalar» AQ Basqarma tóraǵasy Rostıslav Konıashkın memlekettik qyzmetterdi smartfondaý men tsıfrlyq qujattardy paıdalaný úrdisi týraly aıtyp berdi, dep habarlaıdy QazAqparat tilshisi.

Ótken jyly qazaqstandyqtar eGov arqyly 50 mln-nan astam memlekettik qyzmet alǵan jáne bul kórsetkish jyldan-jylǵa artyp keledi. «Ulttyq aqparattyq tehnologııalar» kompanııasy elektrondy úkimettiń jumysyna jaýap beredi. 2022 jyly «UAT» AQ ázirleýshileri kóptegen qyzmetterdi turǵyndardyń uıaly telefondaryna aýystyrýǵa nıetti.

«2022 jyly memlekettik qyzmetterdi smartfonǵa aýystyrýǵa basa kóńil bólemiz. Muny Prezıdent te aıtqan. Qazir noýtbýk pen kompıýter ustaý azaıǵanyn bárimiz túsinemiz. Barlyq turǵyndar uıaly qosymshalardy, telefondardy paıdalanady. Ásirese qarjy sektoryn damytýdyń arqasynda asa tanymal bola tústi», - dedi R. Konıashkın «Habar 24» telearnasyndaǵy «Tsıfrlyq Qazaqstan» baǵdarlamasynda.

Onyń aıtýynsha, qazir smartfonnyń kómegimen 150 myń memlekettik qyzmet qoljetimdi. Memlekettik qyzmetterdi, onyń ishinde qujattardy tsıfrlandyrý arqyly basqa qalaǵa nemese elge ushar aldynda qaǵaz pasporttyń ornyna elektrondy pasportty kórsetýge bolady.

«Qazir tsıfrlyq qujattar arqyly ushaqpen de ushýǵa bolady, 2021 jyly oǵan elimizdiń barlyq áýejaılaryn qostyq. Poıyzda da, ekinshi deńgeıli bankterde de tsırflyq qujatty kórsetýge bolady. Jaqynda ǵana normatıvtik-quqyqtyq aktilerge ózgerister engizildi. Sondaı-aq, valıýta aıyrbastaý kezinde de tsıfrlyq qujattardy paıdalanýǵa bolady. Biz bul tizimdi árdaıym keńeıtip otyramyz», - dep túsindirdi Rostıslav Konıashkın.

EGovmobile ázirleýshileriniń aıtýynsha, qazirdiń ózinde tsıfrlyq qujattardy 6,5 mln-nan astam turǵyn paıdalanady. 2019 jylǵy aqpannan bastap, qazaqstandyqtar tsıfrlyq qujattardy 32 mln ret, áýejaılarda ushý kezinde 20 myń ret paıdalanǵan.