Qazaqstanda egis naýqany bastaldy

ASTANA. QazAqparat - Qazaqstannyń ońtústiginde egis naýqany bastaldy. Bul týraly búgin Ortalyq kommýnıkatsııalar qyzmetindegi brıfıngte QR Aýyl sharýashylyǵy vıtse-mınıstri Saparhan Omarov málim etti.

Onyń sózine qaraǵanda, 2015 jyly aýyl sharýashylyǵy daqyldary 21,5 mln. gektar alqapqa salynbaq. Kóktemgi egis alqaby 18,5 mln. gektardy quraıdy. Atap aıtqanda, dándi daqyldar 15,2 mln. gektarǵa, onyń ishinde bıdaı 12,2 mln. gektarǵa salynady.

Ósimdik sharýashylyǵyn ártataptandyrý boıynsha jumysty kúsheıtý maqsatynda mınıstrlik birqatar sharalar qabyldanǵanyna toqtalǵan S. Omarov, bıdaı óndirisin sýbsıdııalaý normalary qysqartyldy, osy, sondaı-aq qosymsha bólingen qarajat esebinen ózge basym daqyldarǵa kóterińki sýbsıdııa normatıvteri belgilengenin atap ótti. Bıyl bıdaı alqaptary 235 myń gektarǵa (2%), kúrish - 8,5 myń gektarǵa (9%) qysqarady. Sonyń esebinen dándi-jem, burshaqty jáne jarma daqyldarynyń alqaby 104 myń gektarǵa (4%) ulǵaıatyn bolady. Maıly daqyldardy 2,2 mln. gektarǵa, jem-shóp daqyldaryn ótken jylǵy deńgeıden 349 myń gektarǵa ulǵaıta otyryp, 3,7 mln. gektarǵa jýyq alqapta ornalastyrý kózdelgen.

Mınıstrlik málimetine qaraǵanda, aǵymdaǵy jyly kóktemgi dala jumystaryn júrgizýge sharýalardy odan ári nesıelendirýge 60 mlrd. teńge kóleminde bıýdjettik nesıe bólindi. Bul byltyrǵy jylǵy deńgeıden 20 mlrd. teńgege artyq. Bul qarajat qaryz túrinde ekinshi deńgeıli bankter men Azyq-túlik kelisim-shart jáne Agrarlyq nesıe korporatsııalaryna baǵyttaldy.