Qazaqstanda Dostyq elshisi ataǵy taǵaıyndalady
Bul týraly Qazaqstan halqy Assambleıasy (QHA) Keńesiniń keńeıtilgen otyrysynda QHA Tóraǵasynyń orynbasary Darhan Myńbaı málim etti.
«Memleket basshysynyń tapsyrmasymen «QHA Dostyq elshisi» qurmetti ataǵyn bekitý máselesi qarastyryldy. Bul óte ózekti taqyryp, sebebi kóptegen memleketter Assambleıanyń qyzmetine asqan qyzyǵýshylyq tanytýda. Ásirese Eýropa elderinen birqatar delegatsııa tájirıbe almasýǵa keldi. Assambleıanyń shet memleketterde dostary kóp, solar arqyly Qazaqstannyń biregeı tájirıbesin taratý qajet», - dedi Darhan Myńbaı.
Assambleıa keltirgen derekterge sáıkes, Qazaqstan halqy Assambleıasynyń Dostyq elshisi - Qazaqstan halqynyń múddelerine ókildik etetin, sondaı-aq Qazaqstan Respýblıkasynyń jáne ózi turatyn memleket arasyndaǵy ekijaqty qarym-qatynastardy damytý múddesi úshin belgili bir fýnktsııalardy atqaratyn tulǵa.
Dostyq elshisi óz qyzmetin QHA basshylyǵymen kelise otyryp, ózi turatyn memlekette atqarady jáne jyl saıyn 1 qańtarǵa deıin óz qyzmeti týraly QHA-ǵa esep berýi tıis.
Dostyq elshisine óz ókilettigin rastaıtyn jáne tolyq aty-jóni, azamattyǵy kórsetilgen patent beriledi. Patent merzimi úsh jyldan keıin toqtatylady nemese QHA-men kelise otyryp uzartylýy múmkin.