Qazaqstanda dopıngke qarsy zerthana qashan ashylady

NUR-SULTAN. QazAqparat - Qazaqstanda dopıngke qarsy zerthana kelesi jyldyń mamyrynda ashylýy múmkin. Bul jaıynda QR Ulttyq olımpıada komıteti Bas assambleıasynyń otyrysynda belgili boldy, dep habarlaıdy QazAqparat tilshisi.

«Biz sportshylardy ońaltýǵa jáne fýnktsıonaldy dıagnostıkalaýǵa qarajat bóldik. Kelesi jyldan bastap barlyq sportshylarymyz bizdiń ortalyqta osyndaı dıagnostıkadan ótý múmkindigine ıe bolady. Sondyqtan bul da keshendi ǵylymı toptarymyzdyń sportshylarymyzdy súıemeldeýge baǵyttalǵan jumystaryna septigin tıgize alady», - dedi QR Ulttyq olımpıada komıtetiniń prezıdenti Tımýr Qulybaev.

Osy oraıda ol dopıng qoldanýǵa qarsy kúres máselesine de basa nazar aýdardy jáne UOK tarapynan ymyrasyz kúres júrgiziletinin eskertti.

«Dopıngke qarsy ustanymymyzdy bilesizder, bul jalań uran emes. Onymen aınalysamyz. Qoǵamda dopıngke qarsy áreket jetile túsken. Dopıngke qatysy bar adamdardy jazalaý boıynsha zańnamalyq máseleni kótergenimizde Parlamentte qylmystyq jaýapkershilik týraly da usynystar aıtylǵan edi. Biz parlamentarıılerden qazirgi kezeńde qylmystyq jaýapkershilik engizbeýdi ótindik. Sebebi biz dopıngke qarsy júıeni qalyptastyrýymyz qajet. ıAǵnı, bizdiń barlyq bapkerler, federatsııalar munyń turaqty áreket etetin júıe ekenin túsinýi tıis», - dedi UOK prezıdenti.

Osy oraıda otyrysqa qatysyp otyrǵan Mádenıet jáne sport mınıstrliginiń ókili elimizde ashylatyn dopıngke qarsy zerthana osy jyly komıssııa tekserýinen ótetinin aıtty. Al odan keıin osy jyldyń qarashasynda nemese kelesi jyldyń mamyrynda qazaqstandyq dopıngke qarsy zerthana akkredıtteledi.