Qazaqstanda doktorantýraǵa túsýge ótinish qabyldaý bastaldy

ASTANA. QazAqparat - Testcenter.kz saıtynda búginnen bastap 3 tamyzǵa deıin doktorantýraǵa túsý emtıhanyna ótinish qabyldanady, dep habarlaıdy QazAqparat.

Ótinish berý kezinde tek testileý ornyn (qalasyn) tańdaı alasyzdar.

Al test tapsyrý kúni, ýaqyty, mekenjaıy týraly aqparat 9 tamyzda jeke kabınetińizdiń «Meniń is-áreketim» bóliminde usynylady.

Aıta keteıik, ótinish qabyldaý merzimi aıaqtalǵanǵa deıin, ıaǵnı 3 tamyzǵa deıin bilim baǵdarlamalarynyń tobyna, test tapsyrý tili men ornyna (qalasyna) ózgeris engizýge múmkindik beriledi.

Testileýge qatysý quny - 21 072 teńge.

- TOEFL ITP sertıfıkaty bar tulǵalar DTE bastalǵanǵa deıin aǵylshyn tilin bilýge arnalǵan qosymsha testileý (qosymsha testileý) tapsyrady. Qosymsha testileý ótkizý orny men ýaqyty týraly aqparat 4 tamyzda talapkerdiń jeke kabınetinde qoljetimdi bolady. Qosymsha testileýge qatysý quny - 14 162 teńge.

- Byltyrdan bastap túsýshiler mindetti túrde QAZTEST júıesi boıynsha memlekettik tildi meńgergenin rastaıtyn sertıfıkat usynýy kerek.

- Doktorantýraǵa «magıstr» dárejesi jáne keminde 9 (toǵyz) aı eńbek ótili bar nemese medıtsına mamandyqtary boıynsha rezıdentýrada oqý bitirgen adamdar qabyldanady.

- Memlekettik bilim berý tapsyrysy boıynsha jáne aqyly negizde doktorantýraǵa túsý úshin shekti ball - 75.