Qazaqstanda dızel tapshylyǵy joq – Roman Sklıar

NUR-SULTAN. QazAqparat – QR Premer-Mınıstriniń birinshi orynbasary Roman Sklıar Májilis depýtattarynyń saýalyna joldaǵan jaýabynda Qazaqstanda dızel tapshylyǵy joq ekenin málim etti, dep habarlaıdy QazAqparat tilshisi.

«Janar-jaǵarmaıdyń, sonyń ishinde dızel otynynyń tapshylyǵy baıqalyp otyrǵan joq» dep jazylǵan jaýapta.

Sondaı-aq, ol ishki munaı ónimderiniń naryǵynda teńgerim saqtaý úshin 2022 jyldyń aıaǵyna deıin munaı ónimderin Qazaqstan aýmaǵynan syrtqa áketýge tyıym salý máselesi pysyqtalyp jatqanyn atap ótti.

Al ishki naryqta janarmaı saýdasynyń shekteýli kólemde ǵana júrýin boldyrmaý úshin suranys, usynys, baǵa teńgerimine udaıy taldaý jasalyp otyr.

«Búginde munaı óńdeý zaýyttary shtattyq rejımde jumys isteıdi. Oǵan qosa janarmaı óndirý jáne taratý júıesin reformalaýdyń keshendi sharalary qabyldandy. Ol boıynsha ónimsiz deldaldardy naryqtan yǵystyryp, munaıdy óńdeýshi zaýyttarǵa jetkizý shemasy qaıta qaralady. Osylaısha Úkimet janar-jaǵarmaı baǵasynyń negizsiz ári kúrt ósýin boldyrmaý úshin qajetti sharanyń bárin qabyldap jatyr», - deıdi Roman Sklıar.

Aıta keteıik, buǵan deıin dedýtatyq saýaldardyń birine bergen jaýabynda vıtse-Premer Qazaqstanda dızel baǵasy ósip jatqanyn aıtqan edi.