Qazaqstanda dızel otynynyń baǵasy kóterilmeıdi - QR Energetıka mınıstrligi

ASTANA. QazAqparat - Jaqyn arada Qazaqstanda dızel otynynyń baǵasy kóterilmeıdi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Energetıka birinshi vıtse-mınıstri Uzaqbaı Qarabalın málim etti.

Dızel otyny boıynsha memlekettik retteý tolyq kólemde saqtalatyndyǵyna toqtalǵan ol: «Otynnyń bul túrine Úkimet tarapynan shekti baǵany bekitý rejimi qalpynda qalyp otyr. Osy oraıda shekti baǵa bizde sońǵy jyldary dástúrli túrde iske asyrylyp kelgen tıisti formýla aıasynda bekitiledi», - dedi.

U. Qarabalınniń sózine qaraǵanda, búginde elimizde dızel otynynyń qory jetkilikti deńgeıde. Bazalarda 350 myń tonnaǵa jýyq dızel otyny bar. Sonymen birge zaýyttarda da jóneltýge daıyndalǵan qor jınaqtalǵan. Bul turǵyda 70 myń tonnaǵa tarta jaǵarmaıdyń bul túri daıyndaldy.