Qazaqstanda dızel otynyn satýdy esepke alýdyń aqparattyq júıesi iske qosyldy

NUR-SULTAN. QazAqparat - Munaı ónimderiniń jekelegen túrlerin esepke alýdyń aqparattyq júıesiniń bazasynda saralanǵan baǵalar boıynsha dızel otynyn jiberý úshin tutynýshylar derekterin verıfıkatsııalaý boıynsha modýl iske qosyldy, dep habarlaıdy QR Energetıka mınıstrliginiń baspasóz qyzmeti.

Aqparattyq júıeniń fýnktsıonaly naqty ýaqyt rejıminde eldiń avtojanarmaı quıý stantsııalaryna (AJQS) AJQS-ta 1 lıtr úshin 230-260 teńgeden (óńirge baılanysty) satylatyn dızel otynynyń táýliktik kólemin qadaǵalaýǵa múmkindik beredi.

Servıs bıýdjet qarajatynyń shyǵynysyz ázirlengen jáne Іshki ister, Tsıfrlyq damý, ınnovatsııalar jáne aeroǵarysh ónerkásibi mınıstrlikteriniń jáne Memlekettik kredıttik bıýronyń derekter bazasynan qujattardy tekserýdi kózdeıdi.

Esterińizge sala keteıik, 22 tamyzda QR Energetıka mınıstrligi múmkin nusqalardyń biri retinde 2019 jyly ónerkásiptik paıdalanýǵa engizilgen «Munaı ónimderiniń jekelegen túrlerin esepke alýdyń aqparattyq júıesi» qarastyrylyp jatqanyn habarlaǵan bolatyn, aqparattyq júıeniń operatory «Ulttyq aqparattyq tehnologııalar» AQ («UAT» AQ) bolyp tabylady.

Qazirgi ýaqytta kelip túsken ótinishterge sáıkes «UAT» AQ eldegi 2 myń AJQS úshin logınder men parolder usyndy, onyń ishinde 271 AJQS júıeni is júzinde qoldana bastady, ıaǵnı júıe iske qosylǵannan keıin birden paıdalanýshylar retinde «kirgen», jalpy el boıynsha AJQS-tarda 2 365 satý júrgizildi.

Sondaı-aq AJQS operatorlaryna júıemen jumys boıynsha jedel konsýltatıvtik kómek kórsetý úshin QR Energetıka mınıstrligi tarapynan tehnıkalyq qoldaý ortalyǵy iske qosyldy.

QR Energetıka mınıstrligi «UAT» AQ-men birlesip, Munaı ónimderiniń jekelegen túrlerin esepke alýdyń aqparattyq júıesin AJQS, ekinshi deńgeıdegi bankterdiń aqparattyq júıelerimen jáne ózge de aqparattyq júıeler men servıstermen ıntegratsııalaý jumystaryn jalǵastyratyn bolady.

Foto : gov.kz