Qazaqstanda dıplom men attestat QR-kod arqyly tsıfrlyq formatta beriledi

ASTANA. QazAqparat – Ár oqýshynyń tsıfrlyq profıli engiziledi. Bul týraly Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Mektepterdegi oqýlyqtardy tańdaý men monıtorıngileý tsıfrly formatqa kóshiriledi. Attestattar men dıplomdar QR-kodpen tsıfrlyq formatta beriledi. Ár oqýshynyń tsıfrlyq profıli engiziledi. Onda oqýshynyń balabaqshadan bastap mektep nemese kolledj bitirgenge deıingi akademııalyq, áleýmettik jetistikteri, baǵalary, quzyretter kartasy qalyptastyrylady», - dedi A.Aımaǵambetov.

Osy oraıda mınıstr eń qajet degen qyzmetter tolyǵymen eGov pen iri bankterdiń mobıldi qosymshalarynda qamtylatynyn aıtty.

Budan buryn habarlanǵandaı, balabaqshalarda balalardy erte damytýdyń jańa modeli engizilip jatyr. Osy oraıda ondaǵy baǵdarlama da, oqytý ádisteri da túbegeıli ózgeredi.

Sonymen qatar, mektepterge arnalǵan jańa memlekettik standarttar men oqý baǵdarlamalary ázirlenip jatyr.

Búgin Úkimet otyrysynda bilim berýdi damytýdyń 2026 jylǵa deıingi tujyrymdamasynyń jobasy bekitildi.