Qazaqstanda dinı ekstremızmdi nasıhattaıtyn 15 ınternet-resýrs jabyldy

ASTANA. QazAqparat - Qazaqstanda dinı ekstremızmdi nasıhattaıtyn 15 ınternet-resýrs jabyldy. Bul týraly búgin QR Bas prokýratýrasynyń aǵymdaǵy jyldyń 1-shi jartyjyldyǵyndaǵy jumys qorytyndysyn talqylaýǵa arnalǵan keńeıtilgen jıynynda vedomstvo basshysy Ashat Daýylbaev málim etti. Bul jaıynda QR Bas prokýratýrasynyń baspasóz qyzmetinen habarlady.

«Dinı ekstremızm men lańkestikke qarsy turý boıynsha jumystar jandandyryldy. Parlament Májilisimen biz ázirlegen «Dinı ekstremızm men lańkestikke qarsy turý máseleleri boıynsha birqatar zańnamalyq aktilerge ózgertýler men tolyqtyrýlar engizý týraly» Qazaqstan Respýblıkasynyń Zańy maquldandy. 2014 jyldyń 1-shi jartyjyldyǵynda prokýrorlardyń aryzdary boıynsha sottar 15 ınternet-resýrstyń ónimderin zańsyz dep tanydy», - dedi ol.

A.Daýylbaevtyń atap ótýinshe, prokýrorlardyń 175 aqparattyq materıaldardy ekstremıstik mazmunda dep taný týraly aryzdaryn sottar qanaǵattandyrǵan.

«Bul ónimderdi Qazaqstan aýmaǵynda taratýǵa shekteý qoıylǵan», - dedi Bas prokýror.