Qazaqstanda din máselelerine arnalǵan jedel jeli iske qosyldy

ASTANA. QazAqparat - Qazaqstanda azamattarǵa din salasy boıynsha keńes beretin «114 jedel jeli» - www.114.kz resmı saıty iske qosyldy, dep habarlaıdy «QazAqparat» HAA Din isteri jáne azamattyq qoǵam mınıstrliginiń baspasóz qyzmetine silteme jasap.

«114 jedel jelisi» QR Din isteri jáne azamattyq qoǵam mınıstrligi men Dinderdi zertteý ortalyqtary qaýymdastyǵynyń qoldaýymen júzege asyrylady. Joba azamattarǵa din máseleleri boıynsha kásibı jáne ýaqytyly kómek kórsetý múmkindigin beredi. Mamandar telefon jáne saıttyń onlaın jelisi arqyly azamattardyń din taqyrybyndaǵy kez-kelgen saýaldaryna jaýap beredi, dinı arandatýshy áreketterden zardap shekkenderge psıhologııalyq turǵydan qoldaý kórsetedi.

Baılanys qazaq jáne orys tilderinde júrgiziledi. «114 jedel jelisi» saıtynda din salasyndaǵy memlekettik saıasat týraly ózekti aqparattar, maqalalar, suhbattar, sarapshylardyń pikirleri ornalastyrylǵan.

«114 jedel jelisi» - Qazaqstanda ǵana júzege asyrylǵan bastama emes, mundaı qyzmet TMD elderiniń kóbinde bar. qoldanys tapqan. Aıta keteıik, bıylǵy jyldyń sońǵy úsh aıynda (2017 jyldyń 1 sáýirinen 31 maýsymyna deıin) «114 jedel jelisi» mamandary 144-ten astam habarlasqan adamdarǵa jaýap qaıtardy. Kóbinese Qaraǵandy, Almaty, Ońtústik Qazaqstan jáne Aqtóbe oblystarynyń azamattary habarlasqan.

Mamandar ıslam máselesine qatysty suraqtar qoıatyn azamattardyń qatary artqandyǵyn aıtady. Habarlasqandar tarapynan hıdjab kıip, oramal taǵý, namaz oqý, oraza ustaý jáne ıslam dininde erli-zaıyptylardyń ajyrasýy jaıly suraqtar kóp qoıylǵan.

Esterińizge sala keteıik, keńes alý tegin jáne qupııa túrde júzege asyrylady. Qońyraýlar qala telefondarynan «114» nómiri arqyly qabyldanady. Qosymsha qońyraýlar (habarlamalar, foto/vıdeo materıaldardan turatyn basqa da aqparattar) WhatsApp [phone] nomeri arqyly qabyldanady.