Qazaqstanda depýtattyq korpýs jasaryp keledi – ShYU

ASTANA. QazAqparat – Shanhaı yntymaqtastyq uıymy bas hatshysynyń orynbasary Grıgorıı Logvınov elimizdegi saılaý barysyn baqylaýdaǵy atalǵan uıymnyń mıssııasy týraly baıandap berdi, dep habarlaıdy QazAqparat tilshisi.

«Bizdiń mıssııa Qazaqstandaǵy saılaý barysyn buǵan deıin de baqylap keldi. Baqylaý boıynsha tájirıbe bar. Bul joly da úlken jaýapkershilikti sezinip otyrmyz. ShYU baıqaýshylary ótken jyly qarashada ótken prezıdent saılaýy barysyn da qadaǵalady. Bul jolǵy saılaý Qazaqstan Prezıdenti jarııalaǵan qoǵamdyq-saıası júıeni jańartý kýrsy aıasynda jańa model boıynsha júzege asyrylmaq. Biz OSK basshysy Nurlan Ábdirovpen jan-jaqty jáne mazmundy áńgime órbittik. Biz qazaqstandyqtardyń qonaqjaılylyǵyn sezindik. Mindetterimizdi oryndaý úshin qolaıly jaǵdaı jasalatynyna senimdimiz», - dedi Grıgorıı Logvınov Ortalyq saılaý komıssııasynda ótken brıfıngide.

Onyń aıtýynsha, 19 naýryzdaǵy saılaý barysyn ShYU atynan 18 baıqaýshy qadaǵalaıdy.

«Qazaqstanda Májilis pen máslıhattar depýtattyǵyna úmitkerlerdiń ortasha jasy 47-den tómen. ıAǵnı, depýtattyq korpýstyń jasaryp kele jatqanyn bildiredi. Bul Qazaqstannyń odan ári damýyna jańa dem beretini sózsiz. Qazaqstan halqyna tabys tileımin», - deıdi ol.

«Biz eshqashan elderdiń zańnama aktileri jáne saılaý júıesine qatysty baǵa bermeımiz. Shanhaı yntymaqtastyq uıymy ustanymdarynyń biri – elderdiń ishki isine aralaspaý. Ár halyqtyń mádenı jáne qoǵamdyq-saıası qurylǵy júıesi boıynsha tańdaýy men egemendigin qurmetteý», - dep tolyqtyrdy ShYU basshysynyń orynbasary.