Qazaqstanda densaýlyq saqtaýǵa jan basyna shaqqanda 133,5 myń teńge bólinedi
Bul týraly QR Densaýlyq saqtaý mınıstrligine qarasty S. Qaıyrbekov atyndaǵy ulttyq ǵylymı densaýlyq saqtaýdy damytý ortalyǵynyń basqarma tóraǵasy Aleksandr Kostıýk málim etti, dep habarlaıdy QazAqparat tilshisi.
«Densaýlyq saqtaý tehnologııalary álemdegi óte aýqymdy qarajat jumsalatyn salanyń biri. Sonymen qatar atalǵan salaǵa zertteý júrgizý de mańyzdy. Sebebi densaýlyq saqtaý salasyndaǵy barlyq tehnologııa birdeı emes jáne onyń paıdasy da ártúrli. Aldymen onyń tıimdiligin teksergen jón. Qazaqstanda densaýlyq saqtaýǵa bólinetin qarjy jan basyna shaqqanda shashamen 300 dollardy (133 500 teńge) quraıdy. Al AQSh-ta bul kórsetkish 40 esege artyq. Árıne, bul baǵytta bizge áli kóp jumys isteý kerek», - dedi Aleksandr Kostıýk densaýlyq saqtaý tehnologııalaryn baǵalaýdy damytý máselesine arnalǵan halyqaralyq ǵylymı-praktıkalyq konferentsııa barysynda.
Onyń aıtýynsha, densaýlyq saqtaý tehnologııasynyń baǵasy emes tıimdiligi mańyzdy.
«Óıtkeni, adamdarǵa tehnologııanyń qansha turatyny emes, onyń naýqasty emdep shyqqany kerek. Bizdiń elde densaýlyq saqtaý tehnologııasyn baǵalaý 2010 jyldan bastap engizildi. Ókinishke qaraı, baǵalaý keń kólemde júrip jatqan joq. Sondyqtan densaýlyq saqtaý tehnologııasyn baǵalaý tıisti nátıje bere qoımaıtyny belgili. Eger otandyq densaýlyq saqtaý salasyna taldaý jasasaq, shamamen dári-dármekke jumsalatyn qarjyny 20-40 paıyzǵa qysqartyp, ony basqa ınnovatsııalyq jobalarǵa jumsaýǵa bolady. Bul jerde áńgime qoldanystaǵy mańyzdy dári-dármekti qysqartyp tastaý týraly emes. Aldymen taldaý júrgizip, jaǵdaıdy baǵalaý kerek», - deıdi ol.
Aıta keteıik, búgin elordada Shyǵys Eýropa jáne Ortalyq Azııa elderinde densaýlyq saqtaý tehnologııalaryn baǵalaýdy damytý máselesine arnalǵan halyqaralyq ǵylymı-praktıkalyq konferentsııa ótip jatyr.
Atalǵan sharada densaýlyq saqtaý salasyn qarjylandyrý tıimdiligin arttyrý úshin densaýlyq saqtaý tehnologııalaryn baǵalaýdyń rólin arttyrý men oǵan qoıylatyn talaptardy ózgertý máseleleri qaralyp jatyr.
Aıta ketsek, búgin qazaqstandyqtar úshin tar beıindi medıtsına mamandaryna qaralý tártibi jeńildeı túsetini belgili boldy.