Qazaqstanda densaýlyq saqtaý tehnologııalaryn baǵalaıtyn mamandar daıyndalady

NUR-SULTAN. QazAqparat – Elimiz densaýlyq saqtaý salasyndaǵy tehnologııalardyń tıimdiligin baǵalaıtyn mamandardy daıarlaýdy qolǵa aldy.

Bul týraly QR Densaýlyq saqtaý mınıstrligine qarasty S. Qaıyrbekov atyndaǵy ulttyq ǵylymı densaýlyq saqtaýdy damytý ortalyǵynyń basqarma tóraǵasy Aleksandr Kostıýk málim etti, dep habarlaıdy QazAqparat tilshisi.

«Elimizde densaýlyq saqtaý tehnologııalaryn baǵalaý salasynyń mamandaryn daıarlaý jumystary júrip jatyr. Degenmen bul júıeni jetildire túsý qajet. Búginde ulttyq medıtsına ýnıversıteti tehnologııany baǵalaý mamandyǵy boıynsha magıstrlardy daıarlap jatyr. Kelesi jyly Astana medıtsınalyq ýnıversıtetinde de maman daıarlaýdy qolǵa almaqpyz», - dedi Aleksandr Kostıýk densaýlyq saqtaý tehnologııalaryn baǵalaýdy damytý máselesine arnalǵan halyqaralyq ǵylymı-praktıkalyq konferentsııa barysynda.

Onyń aıtýynsha, densaýlyq saqtaý tehnologııalaryn baǵalaý júıesi 2010 jyly bastaldy.

«Bul arnaıy mamandyq emes. Jalpy medıtsına mamandyǵynyń ishine kiredi. Sebebi baǵalaýdyń medıtsınaǵa tikeleı qatysy joq, ol densaýlyq saqtaý salasynyń saıasatyna qatysty jaıt», - deıdi ol.

Aıta keteıik, búgin elordada Shyǵys Eýropa jáne Ortalyq Azııa elderinde densaýlyq saqtaý tehnologııalaryn baǵalaýdy damytý máselesine arnalǵan halyqaralyq ǵylymı-praktıkalyq konferentsııa ótip jatyr.

Atalǵan sharada densaýlyq saqtaý salasyn qarjylandyrý tıimdiligin arttyrý úshin densaýlyq saqtaý tehnologııalaryn baǵalaýdyń rólin arttyrý men oǵan qoıylatyn talaptardy ózgertý máseleleri qaralyp jatyr.

Buǵan deıin ulttyq ortalyq basshysy Qazaqstanda densaýlyq saqtaýǵa jan basyna shaqqanda 133,5 myń teńgeni quraıtynyn aıtty.