Qazaqstanda debat qozǵalysyn damytýshylarǵa tólemaqy jasaý múmkindigi qaraldy

NUR-SULTAN. QazAqparat – Elimizdiń bilim berý oshaqtarynda debat qozǵalysyn damytyp, oqýshylar men stýdentterdiń pikir-saıys qabiletin ilgeriletýshi mamandarǵa qosymsha tólemaqy jasaý ıdeıasy kóterildi. Bul bastamany Bilim jáne ǵylym mınıstri Ashat Aımaǵambetov alǵa tartty, dep habarlaıdy QazAqparat tilshisi.

«Jalpy elimizdiń mektepterinde debat qozǵalysy jaqsy damyp kele jatyr deýge bolady. Balalardyń qyzyǵýshylyǵy bar. Bastysy sapaǵa jumys isteý kerek. Eger keıbir mektepterde debat jattyqshyrýshysy bolmasa nemese debatty uıymdastyratyn tıisti mamandar joq bolsa, onda debattyq qozǵalys bar dep qoldan jasaý qajet emes. Bul kerisinshe pikir-saıys qozǵalysyn damytýǵa kedergi keltiredi. Sondyqtan aldymen debat ótkizýdiń mán-jaıyn biletin kadrdy daıarlap, sharýany sosyn qolǵa alý kerek. Múmkin debatty uıymdastyrýshylarǵa tólemaqy óteý jaǵyn qarastyrý kerek shyǵar», - dedi Ashat Aımaǵambetov mınıstrlikte ótken apparat keńesiniń jıynynda.

Mınıstrdiń aıtýynsha, bilim berý oshaqtarynda debat qozǵalysynyń ilgerileýine úlesin qosyp jatqan mamandardy yntalandyrý kerek.

Sondaı-aq, A.Aımaǵambetov «Oqýǵa qushtar mektep» jobasy týraly sóz qozǵady.

«Bul jobada jaqsy jolǵa qoıylǵan. Men jalpy óńirlerdi aralaǵanda mektep baǵdarlamasynan tys bilim berý jobalarynyń oryndalý barysyn da qadaǵalaımyn. Taıaýda saparmen Aqtóbe oblysynda boldym. Sonda sekildi Martók, Hlebodarovka, Aqjar sekildi shalǵaı eldimekenderde «Oqýǵa qushtar mektep» jobasy jaqsy deńgeıde júzege asyp jatyr. Sonymen qatar SQO-nyń birqatar shetkeı aýyl mektepterinde de bilim jobalarynyń iske asýyn úlgi tutýǵa bolady», - deıdi ol.