Qazaqstanda daýlardyń tek eki paıyzy ǵana sotqa deıingi tártipte sheshiledi

ASTANA. QazAqparat - Qazaqstanda ortasha alǵanda daýlardyń 2 paıyzy ǵana sotqa deıingi tártipte sheshiledi. Bul týraly búgin etnıkaaralyq qatynastar jáne etnosaıasatqa arnalǵan semınar-trenıngte Qazaqstan xalqy Assambleıasy Tóraǵasynyń orynbasary Eraly Toǵjanov málim etti.

«Biz AQSh jáne eýropalyq elder boıynsha taldaýdy qarap shyqtyq, ıaǵnı bul elderde sot máseleleriniń 70 paıyzyna deıingisi sotqa deıingi tártipte sheshiledi. Al bizde ortasha alǵanda bul kórsetkish 2 paıyzdy qurap otyr»,-dedi E. Toǵjanov.

Osy rette ol otyrysqa qatysýshylardy medıatsııa boıynsha qyzmetti jandandyrýǵa shaqyrdy. Sebebi, bul baǵyttaǵy sharalar qomaqty qarjyny únemdeýge múmkindik beredi, sondaı-aq daý-damaıdyń aınalasyndaǵy taraptardyń moraldyq jáne psıhologııalyq kúızelisin tómendetýge yqpal etedi.

«Eger de halyqaralyq tájirıbede 70 paıyzǵa deıin jetse, onda Qazaqstanda aldymen 20 paıyz deńgeıine jetkizý kerek. Bul ońaı sharýa emes. El azamattarynyń úshten biri mindetti túrde qandaı da bir sot protsesterine tap bolady»,-dedi E. Toǵjanov.