Qazaqstanda dárigerlerdiń balalaryna arnalǵan qaıyrymdylyq jobasy júzege asýda

NUR-SULTAN. QazAqparat - Karantınniń jeńildeýine qaramastan, koronavırýs indetimen kúres áli de jalǵasýda. Koronavırýs indetiniń alǵashqy kúnderinen bastap medıtsına qyzmetkerleri árdaıym aldyńǵy qatarda jáne myńdaǵan adamdardyń ómiri úshin kúres júrgizýde. Bul indet kezinde medıtsına qyzmetkerleri óz otbasylary men balalarynan alys qalýda. QR Mádenıet jáne sport mınıstrligi dárigerlerdiń balalaryn qoldaý maqsatynda «Paıdaly bos ýaqyt» mádenı bilim berý jobasyn júzege asyrýda, dep habarlaıdy QazAqparat tilshisi.

«Medıtsına qyzmetkerleriniń eńbegi – naǵyz erlik. Tótenshe jaǵdaı, shamadan tys júkteme, birneshe saǵattyq aýysym, juqtyrǵandar arasynda qıyn jumys. Biraq eń bastysy – koronavırýs indeti kezinde medıtsına qyzmetkerleri óz otbasylary men balalarynan alys qalýda. Bul synaq medıtsına qyzmetkerleriniń balalaryna da ońaı bolǵan joq. Karantın kezinde mektepter, úıirmeler men damý ortalyqtary jumysyn ýaqytsha toqtatqanyn eskerer bolsaq, dárigerlerdiń balalary erekshe nazar aýdarýdy qajet etedi», - deıdi QR Mádenıet jáne sport mınıstrligindegiler.

Dárigerlerdiń balalaryn qoldaý zamanymyzdyń batyrlaryna kómektesýdiń tıimdi tásilderiniń biri. Dál osyndaı joba QR Mádenıet jáne sport mınıstrliginiń bastamasymen júzege asyrylýda. «Igilik úshin bos ýaqyt» atty jańa mádenı-bilim berý jobasy aıasynda búkil eldegi medıtsına qyzmetkerleriniń balalary onlaın rejıminde tegin bilim alýda.

Baspasóz qyzmetinde habarlanǵandaı, balalar óner jáne sport salasyndaǵy pánderin oqýda. Balalarǵa keskindeme, akterlik sheberlik, dombyra, gıtara, fortepıano, estradalyq án, skrıpka, erkin kúres, boks, dzıýdo, gımnastıka, toǵyzqumalaq sııaqty kóptegen pánder usynylǵan.

«Osyndaı jan-jaqty tańdaýdyń arqasynda dárigerlerdiń balalary karantındik demalys kezinde baı mádenı demalyspen qamtamasyz etilgen dep senimdi túrde aıta alamyz», - delingen QR Mádenıet jáne sport mınıstrliginiń baspasóz habarlamasynda.

Arnaıy joba úshin bilim alýdyń yńǵaılylyǵy men oqýshylardyń avtorızatsııasynyń jedeldigin qamtamasyz etetin jalpyǵa qoljetimdi bilim berý platformasy quryldy.

Joba aıasynda elimizdiń ártúrli oblystary men óńirlerinen 9-15 jas aralyǵyndaǵy 186 oqýshy bilim alýda. Onlaın formattaǵy ózin-ózi damytýmen balalar toptyq jáne jeke onlaın sabaqtarda aınalysa alady. Oqýshylar tanymdyq sheberlik sabaqtaryna belsendi qatysady. Sheberlik sabaqtaryn kóptegen óner jáne sport mamandary ótkizdi. Olardyń ishinde: QR Halyq ártisi, Qazaqstannyń Eńbek Eri Aıman Musaqojaeva, Baǵym Muhıtdenova, Ermahan Ibraımov, Eldos Smetov, Ánýar Sadyqova, Baıan Qajnabıeva, Maqsat Medeýbek jáne t. b. óner jáne sport qaıratkerleri bar.

«Igilik úshin bos ýaqyt» jobasy dárigerler men olardyń balalary arasynda birden oń baǵalandy. Joba týraly óziniń pikirlerin eldiń ártúrli aımaqtarynan dárigerler jiberedi. Medıtsınalyq ata-analar joba oqytýshylaryna ár balanyń yntasy men qoldaýy úshin, balalardyń shyǵarmashylyq jáne sporttyq áleýetin ashýǵa kómekteskeni úshin alǵys bildirýde. Balalar, óz kezeginde, sabaqtar týraly jaǵymdy áserlerimen bólisýde.

Mınıstrlikte atap ótkendeı, «Paıdaly bos ýaqyt» jobasynyń kómegimen mádenıet jáne sport qaıratkerleri myńdaǵan qutqarylǵan ómirleri úshin dárigerlerge óz rızashylyqtaryn bildirip, olardy qoldaýǵa tyrysady. Osylaısha, koronavırýs indeti dárigerler men mádenıet jáne sport qyzmetkerlerin biriktirýde. Balalardy qoldaý, árıne, kún saıyn el azamattarynyń densaýlyǵy úshin erlik jasaıtyn ata-analarynyń jumysyna jaǵymdy áser etedi.

Eske sala ketsek, elimizde «Paıdaly bos ýaqyt» dep atalatyn jańa joba iske qosylǵanyn jazǵan bolatynbyz. Jańa bastamanyń basty ereksheligi – balalar qyzyǵýshylyǵy boıynsha onlaın sabaqty ózderi tańdaı alady.