Qazaqstanda dárigerdiń kásiptik jaýapkershiliginiń mindetti saqtandyrý júıesi engiziledi

ASTANA. QazAqparat – Medıtsına qyzmetkerleriniń kásiptik jaýapkershiligi boıynsha mindetti saqtandyrý júıesi engiziledi. Bul týraly Májiliste «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

Onyń aıtýynsha, medıtsına qyzmetkerleriniń praktıkalyq qyzmeti qoǵamnyń ıgiligi úshin únemi qaýip-qatermen baılanysty mamandyqtarǵa jatady. ıAǵnı kúrdeli ári jaýapty mamandyq. Alaıda bul aýyr eńbek qoǵamda tıisti deńgeıde baǵalanbaı otyr. Sondyqtan patsıentterge qatysty keltirilgen zııandy óteý quqyqtaryn iske asyrý úshin medıtsına qyzmetkerleriniń kásiptik jaýapkershiligi boıynsha mindetti saqtandyrý júıesin kezeń-kezeńmen engizýdi josparlanyp otyr.

«Bul reforma kórsetiletin medıtsınalyq kómektiń sapasyn arttyrýǵa múmkindik beredi jáne jalpy Qazaqstan Respýblıkasy densaýlyq saqtaý salasynyń halyqaralyq arenadaǵy jaqsy reıtıngine yqpal etedi. Qazir «Halyq densaýlyǵy jáne densaýlyq saqtaý júıesi týraly» QR Kodeksiniń 270-babynda medıtsınalyq kómek kórsetý kezinde patsıenttiń ómirine nemese densaýlyǵyna zııan keltirilgen jaǵdaıda medıtsına qyzmetkerleriniń kásiptik jaýapkershiligin saqtandyrý quqyǵy zańnamalyq túrde bekitilgen. Ondaı norma bar, al zań jobasy osy qadamdardy iske asyrý joldaryn bekitedi», - dedi A. Ǵınııat.

Osy oraıda vedomstvo basshysy zań jobasy medıtsına qyzmetkerleriniń mártebesin arttyrýǵa, naýqastardyń quqyqtaryn qorǵaýǵa jáne medıtsınalyq kómektiń sapasyn arttyrýǵa baǵyttalyp otyrǵanyn aıtty.