Qazaqstanda dáriger mamandarynyń tapshylyǵy bar

NUR-SULTAN. QazAqparat – QR Premer-Mınıstriniń orynbasary Eraly Toǵjanov Májilis ókilderiniń depýtattyq saýalyna joldaǵan jaýabynda aýrýhanalardaǵy klınıkalyq dárigerlerdiń tapshylyǵy qalaı sheshiletinin túsindirdi, dep habarlaıdy QazAqparat tilshisi.

«Taldaýlar aýdandyq aýrýhanalarda ǵana emes, qalalyq jáne oblystyq deńgeılerde de kadr tapshylyǵy bar ekenin kórsetti. Jyl saıyn rezıdentýrada bilikti mamandarmen qamtamasyz etý úshin klınıkalyq mamandyqtar boıynsha kadr daıarlaýǵa memlekettik bilim berý tapsyrysy bólinedi. 2021 jyly sonyń aıasynda 1500 oryn bólindi. Onyń ishinde 26 nevrolog, 200 anestezıolog-reanımatolog, 18 neırohırýrg bar», - delingen jaýapta

Onyń aıtýynsha, jyl saıyn respýblıkalyq bıýdjetten medıtsına qyzmetkerleriniń kásibı deńgeıin arttyrýǵa qarajat bólinedi. Atap aıtqanda, 2020 jyly biliktilikti arttyrýdan 10 578 dáriger ótken. Onyń ishinde 743 anestezıolog-reanımatolog, 269 nevrolog, 49 medıtsınalyq reabılıtolog, 34 neırohırýrg bar.

«2021 jyly jergilikti bıýdjetter esebinen 161 maman shetelde oqýdan ótti. Sheteldiń jetekshi mamandarynyń qatysqan master-klastarda 734 adam oqytyldy. Onyń ishinde 30 adam «Insýlt alǵan naýqastardy ońaltýdaǵy mýltıdıstsıplınarlyq tásil» taqyrybynda (Reseı Federatsııasy), 11 adam «Julyn neırohırýrgııasynyń ózekti máseleleri» taqyrybynda» (Germanııa) bilimin jetildirdi. Bıyl «Insýlt kezinde medıtsınalyq kómek kórsetý» baǵyty boıynsha 154 dáriger (nevrolog, medıtsınalyq reabılıtolog, neırohırýrg) jáne 220 orta medıtsınalyq qyzmetkerdi oqytý kózdelgen,» - dep dep jazady Premer-Mınıstrdiń orynbasary.

Aıta keteıik, QR Densaýlyq saqtaý mınıstrligi jumysqa turý úshin medıtsınalyq tekserýden ótý nege aqyly ekenin habarlady.