Qazaqstanda dári-dármek óndirisi 18 paıyzǵa qysqarǵan
2021 jyly farmatsevtıkalyq kompanııalar 198,7 mlrd teńgege ónim shyǵarsa, ótken jyly ol 162,6 mlrd teńgege azaıǵan.
Dári-dármek óndirý 4,5% jáne farmatsevtıka salasynda ózge de óndiris 61,1% kemigen.
Sondaı-aq, óndiristiń azaıýy koronavırýsqa qarsy farmatsevtıkalyq ónimderdi aýqymdy kólemde shyǵarýdy toqtatýmen baılanysty.
Bul eń aldymen, «Spýtnık V» vaktsınasyna qatysty. Ekpeni Qaraǵandy farmatsevtıka kesheni óndirdi.
Atalǵan memlekettik tapsyrys Qaraǵandy oblysynyń 2021 jyly dári-dármek óndirisi boıynsha kóshbasshylar úshtigine kirýine sebep boldy.
Sol kezde óńirdegi óndiristiń jalpy kólemi 47,6 mlrd teńgege jetti. 2022 jyly vaktsına shyǵarý aıaqtalǵannan keıin kórsetkish 2,5 ese nemese 19,1 mlrd teńgege deıin tómendedi.
Nátıjesinde atalǵan óńir farmatsevtıkalyq aımaqtar tiziminde tórtinshi orynǵa jyljydy.
Dári-dármek óndirisi boıynsha kóshbasshylar úshtigi ótken jyldy jaqsy dınamıkamen aıaqtady.
Atap aıtqanda, Shymkentte 57,6 mlrd teńgege (plıýs 13%) dári-dármek óndirildi.
Odan ári Almaty oblysynyń farmatsevtıkalyq kásiporyndary 39,5 mlrd teńgege (plıýs 39,2%) jáne Almaty qalasy 18,7 mlrd teńgege (plıýs 16,2%) ónim shyǵardy.
Sonymen qatar, ótken jylǵy statıstıka dári-dármek boıynsha ımport kóleminiń artqanyn kórsetip otyr.
Byltyr qańtar–jeltoqsan aılarynda Qazaqstan shamamen 1,4 mlrd AQSh dollary somasyna 26,4 myń tonnadan astam dári-dármek satyp aldy.
Fızıkalyq kólem jaǵynan da (21,8%) jáne qundyq mánde de (25%) ósim baıqaldy.
Proxima Research Inretnational halyqaralyq taldaý kompanııasynyń málimetine sáıkes, ótken jyldyń qorytyndysy boıynsha Qazaqstanda dári-dármekti tutyný kólemi 1,3% nemese 626 mln-nan 618 mln qaptamaǵa deıin azaıǵan.
Kórsetkishtiń tómendeýi memlekettiń medıtsınalyq mekemelerge dári-dármekti az kólemde satyp alýymen baılanysty.
Bul óz kezeginde Qazaqstannyń ortalyqtandyrylǵan dári-dármekti satyp alýdyń biryńǵaı operatoryna 52 mlrd teńgeden astam qarjyny únemdeýge kómektesti.
Máselen, ótken jyly memlekettik shyǵyndardyń jalpy somasy 336 mlrd teńgeni qurady. Bul 2021 jylmen salystyrǵanda 13,4% az.
Al bólshek saýdada eshqandaı ózgeris baıqalmady. Halyqtyń dári-dármekti satyp alýy azaıǵanyna qaramastan, ótken jyldyń qorytyndysy boıynsha baǵa 9,3% ósti.
Qazaqstandaǵy halyqaralyq farmatsevtıkalyq óndirýshiler qaýymdastyǵy sarapshylarynyń pikirinshe, naryqtyń bólshek segmenti kóleminiń aqshalaı túrde ulǵaıýy kóbine ınflıatsııaǵa baılanysty.
Jalpy byltyr qazaqstandyqtar dári-dármekke memleketke qaraǵanda áldeqaıda kóp aqsha jumsaǵan. Naqtyraq aıtqanda, 527 mlrd teńge.
Pandemııanyń ekinshi jyly dárihanalar 482 mlrd teńge tabys tapqan.
Otandyq Shymkent Santo jáne Almaty Nobel farmatsevtıkalyq zaýyty dári-dármek jetkizý boıynsha úzdik ondyqtyń qataryna kirdi.
Shymkent Santo bir jyl ishinde 28,7 mlrd teńgege ónim satyp kóshbasshy atansa, Nobel 16,4 mlrd teńge kórsetkishimen altynshy orynǵa ornalasqan.