Qazaqstanda dári-dármek qymbattaýy múmkin – farmatsevter tańbalaý erejesine qarsy

<p>ASTANA. KAZINFORM &ndash; 1 shildeden bastap Qazaqstanda dárilik zattar men medıtsınalyq buıymdarǵa mindetti tańbalaý engiziledi. Osylaısha bılik elge óndiriletin jáne ákelinetin dári-dármekterdiń sapasyn arttyrýǵa, sondaı-aq kóleńkeli naryqty joıýǵa nıetti. Alaıda, dárihana ıeleri bul <a href="https://kaz.inform.kz/news/elmzde-1-shldeden-bastap-ondrlgen-darler-tanbalanatin-boladi-8ea5f5/" target="_blank" rel="noopener">erejege </a>narazy.</p>

Qazaqstandyq táýelsiz dárihanalar qaýymdastyǵynyń basshysy Talǵat Omarovtyń aıtýynsha, jańa ereje dári-dármektiń qymbattaýyna ákelip soǵady.

«Bizdiń qaýymdastyqta 3 myńnan astam dárihana bar jáne olardyń 70 paıyzy tańbalaýǵa áli daıyn emes. Aldyn ala zertteýge sáıkes, tańbalaý kúshine ense, árbir dárihana aı saıyn 400 myń teńge qosymsha shyǵynǵa ushyraıdy. Sáıkesinshe ony óteý úshin dári-dármekti qymbattatý kerek. Naryqta dári jetkizetin 4 býyn bar ekenin túsiný kerek – óndirýshi, dıstrıbıýtor, kóterme kompanııalar jáne dárihana. Bul jaǵdaıda ár sýbekt óz marjasyn qosyp otyrady, al kóterme kompanııalar shtatty birneshe adamǵa kóbeıtýi kerek. Munyń bári baǵaǵa qalaı áser etedi, muny eskergen eshkim joq. Jańa ereje engizbeı turyp, bárin aldyn ala esepteý qajet edi. Bári Premer-Mınıstr oılaǵandaı minsiz emes. Preparattardyń baǵasy 27-40 paıyzǵa deıin qymbattaýy múmkin», - deıdi qaýymdastyq basshysy.

Spıker preparat qunyna áserin tıgizbeıtin basqa mehanızmder qajet ekenin aıtýda.

Almatydaǵy dárihana ıesi Kamılla Kabırıdzeniń aıtýynsha, tańbalaýdy engizý aıtarlyqtaı qarjylyq salymdardy talap etedi, óıtkeni ol úshin biryńǵaı júıege qosylyp, jabdyq satyp alý qajet.

Onyń aıtýynsha, kóptegen kásipkerler buǵan qol jetkize almaıdy.

«Jabdyqtyń ózi qymbat emes – 20-50 myń teńge aralyǵynda, biraq arnaıy baǵdarlamany qosý kerek. Baǵdarlamanyń quny qalaǵa baılanysty 500 myńnan 2 mln teńgege deıin jetedi. Qaı kásipkerdiń qaltasynda artyq 2 mıllıon teńge bar? Oǵan qosa, jańa tańbalaý júıesimen jumys isteý úshin dárihanalar qosymsha mamandardy jaldaýy kerek. Bizge farmatsevt, provızor, taýar mamany kerek. Al farmatsevter qazirdiń ózinde jetispeıdi», - deıdi dárihana basshysy.

Sonymen birge, ıntegratsııa baǵdarlamasy, tańbalaý adamnyń ETsQ kilti arqyly júrgiziletindikten, kıberqaýipsizdik, kommertsııalyq qupııalylyq máselesi de týyndaıdy.

Eldegi, ásirese aýyldardaǵy ınternet sapasy da jańa tańbalaý júıesiniń jumysy úshin óte mańyzdy.

«Qazir kóptegen qazaqstandyqtar qarjylyq qıyndyqtarǵa baılanysty dári-dármekterdi bólshektep satyp alady. Al tańbalaý engizilse, dárini bir danadan satýǵa esh múmkindik bolmaıdy, dárige qoljetimdilik azaıady. Mysaly «Senade» preparatynyń bir qaptamasynda 500 dana dári bar, bir naýqas úshin bul tym kóp. «Teraflıý» dárisin de bir-birlep satý toqtaıdy. Bul suraqtardyń jaýaby ázirge joq», - dedi K. Kabırıdze.