Qazaqstanda damý erekshelikteri bar balalarǵa arnalǵan mamandardy oqytý bastaldy

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi men BUU Balalar qorynyń (ıÝNISEF) qoldaýymen Almatyda «Sensorlyq ıntegratsııa jáne balanyń damýy. Sensorlyq ıntegratsııaǵa negizdelgen terapııalyq tásilder» baǵdarlamasy boıynsha densaýlyq saqtaý jáne bilim berý salasynyń 28 mamanyn úsh aptalyq oqytý bastaldy, dep habarlaıdy QazAqparat.

«Atalǵan baǵdarlamaǵa úsh kezeńdik irikteýden ótken psıhologtar, defektologtar, logopedter, dárigerler, EDSh/ADSh jattyqtyrýshylary jáne JOO oqytýshylary qatysty. Kýrs aıasynda qabyldaýdyń taktıldi, vestıbýlıarlyq, proprıotseptıvti jáne basqa da ádisterine ári sensorlyq sezimderge baǵdarlanǵan aýtıstik spektri buzylǵan balalarmen jumystaǵy sensorlyq-ıntegratıvtik tásil zerdelenetin bolady», - delingen Eńbek mınıstrligi málimetinde.

Sensorlyq ıntegratsııa qarym-qatynasty jaqsartýǵa, stereotıptik qaıtalanatyn qozǵalystardyń azaıýyna, zeıinniń shoǵyrlanýyna yqpal etedi, sonymen qatar kóptegen elderde qoldanylatyn ergoterapııa baǵdarlamasynyń bóligi bolyp sanalady.

Bul kýrstyń basty maqsaty - aýtıstik spektrdegi aýrýlary bar balalarǵa kómek jáne túzetý kórsetetin memlekettik densaýlyq saqtaý, bilim berý ári áleýmettik qorǵaý mekemeleriniń baǵdarlamasyna ergoterapııanyń bir bóligi retinde sensorlyq-ıntegratsııalyq ádisterin engizý.

Baǵdarlama aıaqtalǵannan keıin, árbir qatysýshy alǵan bilimi men quzyrettiligi negizinde óziniń sensorlyq ıntegratsııa kýrsyn ázirleıdi jáne oǵan densaýlyq saqtaý, bilim berý jáne áleýmettik qorǵaý salasyndaǵy uıymdardyń keminde 10 qyzmetkerin óteýsiz negizde oqytady dep josparlanýda.

Budan basqa, bilim alǵandar arasynda master-jattyqtyrýshylar iriktelip alynady, olar joǵary oqý oryndary úshin ulttyq ádistemeler men bilim berý baǵdarlamalaryn ázirleýge tartylatyn bolady, sondaı-aq keıinnen densaýlyq saqtaý, bilim berý jáne halyqty áleýmettik qorǵaý mekemeleriniń mamandaryn jappaı oqytýdy bastaıdy.