Qazaqstanda «Dala qyrany» halyqaralyq oqý-jattyǵýy aıaqtaldy

NUR-SULTAN. QazAqparat - «Іle» oqý-jattyǵý polıgonynda «Dala qyrany» halyqaralyq bitimgerlik taktıkalyq-arnaıy oqý-jattyǵýynyń jabylý rásimi ótti. Іs-sharaǵa QR Qorǵanys mınıstriniń orynbasary general-maıor Tımýr Dándibaev qatysty, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Sondaı-aq, jabylý rásimine Qazaqstan Respýblıkasynda akkredıttelgen áskerı-dıplomatııalyq korpýs ókilderi men dıplomatııalyq mıssııa basshylary qatysty.

Oqý-jattyǵý aıasynda Ulybrıtanııa, Úndistan, Qyrǵyzstan, Tájikstan, Túrkııa, Ózbekstan jáne Amerıka Qurama Shtattarynan kelgen áskerı qyzmetshiler bitimgerlik operatsııa elementterin birlesip jasady.

Atap aıtqanda, blok-beketterde qyzmetter atqarý, gýmanıtarlyq júkterdi qaraýyldap alyp júrý, jergilikti turǵyndarmen kelissózder júrgizý, tóńirekti patrýldeý, mınalanǵan dalany, joldy zalalsyzdandyrý, tazartý jáne sýmen qamtamasyz etý, sondaı-aq alǵashqy medıtsınalyq kómek kórsetý boıynsha tapsyrmalar oryndaldy.

Oqý-jattyǵý 2003 jyldan beri áskerı qyzmetshilerdiń birlesken teorııalyq jáne praktıkalyq tapsyrmalardy oryndaý barysynda alǵan bitimgerlik daǵdylaryn jetildirý maqsatynda ótkiziledi.