Qazaqstanda «Dala búrkiti - 2016» bitimgershilik oqý-jattyǵýy bastaldy (FOTO)

ASTANA. QazAqparat - Búgin «Іle» oqý-jattyǵý ortalyǵynyń bazasynda «Dala búrkiti - 2016» taktıkalyq-arnaıy bitimgershilik oqý-jattyǵýynyń bastapqy kezeńi bastaldy. Іs-sharaǵa Amerıka Qurama Shtattary men Ulybrıtanııa Qarýly Kúshteriniń 60-tan asa ókili qatysady.

Alǵashqy kezeń sheńberinde qazaqstandyq «Qazbat» bitimgershilik  batalonynyń áskerı qyzmetshileri amerıkalyq jáne brıtandyq áriptesterimen birlesip batalon shtabynyń jumysy, rotanyń jeke quramyn basqarý, kúshti, taktıkalyq baılanysty qoldaný erejeleri, ınjenerlik-saperlik toptyń is-qımyldary, taktıkalyq medıtsınalyq kómek pen kóshirýdi oryndaý, sýdy tazartý boıynsha sertıfıkatsııa alý jáne t.b. boıynsha tájirıbe almasady.

Aıta keterlik jáıt, oqý-jattyǵý nıetine sáıkes «Dala búrkiti - 2016» bitimgershilik oqý-jattyǵýynyń ekinshi kezeńin Ulybrıtanııa aýmaǵynda ótkizý josparlanýda.

Ol jerge qazaqstandyq «Qazbat» bitimgershilik batalonynyń 250-ge jýyq áskerı qyzmetshisi attanady. Jeke quram men qarý-jaraqty jóneltý úshin QR Qarýly Kúshteriniń áskerı-kóliktik avıatsııasy tartylady.  

Esterińizge sala keteıik, aldyńǵy «Dala búrkiti - 2014» bitimgershilik oqý-jattyǵýy Germanııa Federatıvtik Respýblıkasynda ótken bolatyn. Oǵan QR QK-niń 150-den asa áskerı qyzmetshisi tartyldy.