Qazaqstanda byltyr sýsyndar men temeki kóp óndirilgen

ASTANA. QazAqparat – Ótken jyly elimizde sýsyndar, temeki jáne munaı óńdeý ónimderi, negizgi asyl jáne tústi metaldar óndirisi artty. Bul týraly Ulttyq statıstıka bıýrosynan málim etti, dep habarlaıdy QazAqparat.

Ónerkásip óndirisiniń ındeksi 2022 jylǵy qańtar-jeltoqsan aılarynda 101,1 % qurady.

«2022 jylǵy qańtar-jeltoqsanda ónerkásip ónimi 48 007 mlrd teńgege óndirildi, onyń ishinde taý-ken óndirý ónerkásibi salasynda – 24 644 mlrd teńge (jalpy kólemnen 51,3%), óńdeý ónerkásibinde – 20 697 mlrd teńge (43,1%).

Taý-ken óndirý ónerkásibi men karerlerdi qazýda ónerkásip óndirisiniń ındeksi 99% qurady. Bul shıki munaı (98,1%), tabıǵı gaz (99%) ben temir keni (79,4%) óndirisiniń azaıýyna baılanysty boldy.

Óńdeý ónerkásibinde óndiris 3,4% ulǵaıdy. Sýsyndar (111,2%), temeki ónimderi (107,9%), munaı óńdeý ónimderi (101,8%), hımııa ónerkásibiniń ónimderi (110,2%), rezeńke jáne plastmassa buıymdary (102,1%), negizgi asyl jáne tústi metaldar (105,5%), avtokólik quraldarynyń (119,1%) óndirisi artty.

Óndiris kóleminiń ósýi respýblıkanyń 13 óńirinde tirkeldi, aıtarlyqtaı ósim Aqmola (13,4%), Jambyl (10,2%), Abaı (9,7%) oblystarynda jáne Almaty qalasynda (9,6%) baıqaldy.

Tómendeý Túrkistan (6,3%), Qostanaı (5,5%), Atyraý (2,1%), Qyzylorda (1,8%) Batys Qazaqstan (1%) jáne Pavlodar (0,5%) oblystarynda baıqaldy.