Qazaqstanda byltyr 129,5 tonna óńdelmegen altyn óndirilgen

ASTANA. QazAqparat - Dál osyndaı ataýmen elimizdiń bas shaharynda Qazaqstannyń altyn óndirýshi ónerkásipshileriniń «Salany damytýdyń naryqtyq tetikterin engizý: barlaý, óndirý, satý» atty forýmy ótti. Aýqymdy jıynǵa QR Indýstrııa jáne ınfraqurylymdyq damý vıtse-mınıstri Iran Sharhan qatysty, dep habarlaıdy QazAqparat.

Vıtse-mınıstrdiń aıtýynsha, byltyr otandyq kásiporyndar 129,5 tonna kóleminde óńdelmegen altyn óndirgen. Bul 2021 jyldaǵy kórsetkishten 12,8%-ǵa kóp.

«Elimizde altyn óndirý kásibi otandyq taý-ken sektoryndaǵy negizgi salalardyń biri bolyp sanalady. 2022 jyl Qazaqstannyń altyn óndirý ónerkásibi úshin tabysty jyl boldy. Mysaly, quramynda altyn bar ken oryndaryn ıgerý aıtarlyqtaı ulǵaıyp, atap aıtqanda 39,4 mln tonnaǵa deıin baǵaly metall óndirilip, bul byltyrǵy kólemnen 18,3%-ǵa kóp bolyp shyqty», - dedi I.Sharhan.

Sondaı-aq I.Sharhan Qazaqstannyń affınajdy zaýyttary sheteldik kásiporyndarǵa tollıng qyzmetin usynyp kele jatqanyn jetkizdi. Atalǵan kásiporyndar London metaldar bırjasynyń Good Delivery mártebesine ıe. Bul óz kezeginde otandyq óndirýshilerdiń joǵary tehnologııalyq óndiristi jolǵa qoıǵandaryn dáleldep, sondaı-aq sheteldik ınvestorlardyń aldynda úlken senimge ıe bolǵandaryn kórsetip otyr.

Qazir elimizdegi resýrstyq baza óndiristik qýatty arttyrýǵa jol ashyp otyrǵanyn aıta keteıik. Máselen, 2022 jyly Aqmola oblysyndaǵy Raıgorodok ken ornyn ıgerip jatqan RG Gold altyn óndirýshi kompanııasy jańa taý-ken metallýrgııalyq keshenin iske qosty. Kásiporyn jylyna 5 mln tonnaǵa deıin shıkizatty óndirýge qaýqarly.

Budan bólek shamamen 11 mlrd teńge mólsherindegi ınvestıtsııaǵa 600-den asa turaqty jumys ornyn ashýdy kózdeıtin birqatar joba iske asyrylyp keledi.