Qazaqstanda búgin - Alǵys aıtý kúni
Alǵys aıtý kúni - beıbitshilik pen dostyqqa, tynyshtyq pen yntymaqqa úndeıtin mereke. Bul keńqushaq qurmet - elimizdegi túrli ult ókilderiniń arasyndaǵy adamgershilik qarym-qatynastyń ónegeli ólshemine aınaldy. Alǵys aıtý kúni halqymyz úshin aıtýly izgi dástúrge aınaldy.
Qazaqstan halqy búgin tarıhynda altynshy ret Alǵys aıtý kúnin atap ótedi.
2016 jyldyń 14 qańtarynda Elbasy Nursultan Nazarbaev Jarlyqqa qol qoıyp, oǵan sáıkes, 1 naýryz - elimizde Alǵys aıtý kúni dep jarııalandy.
Aıta keterligi, dál osy 1 naýryz kúni elimizde Qazaqstan halqy Assambleıasy qurylǵan bolatyn.
N. Nazarbaev 2015 jyldyń 22 sáýirinde Assambleıanyń XXII sessııasynda Alǵys aıtý kúnin belgileýge ne túrtki bolǵanyn tarıhpen baılanystyra otyryp aıtyp bergen edi. Tuńǵysh Prezıdent stalındik rejim kezinde Qazaqstanǵa kóptegen halyqtar jer aýdarylǵanyn - 800 myńǵa jýyq nemis, 102 myń polıak, 550 myń Soltústik Kavkaz halqynyń ókilderi, 18,5 myń Qıyr Shyǵystaǵy koreı otbasylary kóship kelýge májbúr bolǵanyn eske salǵan bolatyn.
Taǵdyrdyń tálkegimen elimizge qonys aýdarǵan túrli etnos ókilderin qazaq halqy qushaq jaıa qarsy alyp, aýyrtpalyq ataýlyny birge kóterdi. Bul kún - qıyn-qystaý kezeńderde qýanysh-qaıǵyny bólisip, pana bola bilgen qazaq halqyna ózge ult ókilderiniń alǵys aıtatyn kúni.