Qazaqstanda birqatar eldiń depýtattary transshekaralyq sý resýrstary máselesin talqylaıdy

<p>ASTANA. KAZINFORM &ndash; Eýropadaǵy qaýipsizdik jáne yntymaqtastyq uıymy Parlamenttik Assambleıasynyń delegatsııasy Qazaqstanǵa saparmen keledi. Bul týraly Syrtqy ister mınıstrliginiń resmı ókili Aıbek Smadııarov aıtty.</p>

«2024 jylǵy 8-9 sáýirde Ortalyq Azııa boıynsha arnaıy ókil Farah Karımı bastaǵan Eýropadaǵy qaýipsizdik jáne yntymaqtastyq uıymynyń Parlamenttik Assambleıasy (EQYU PA) delegatsııasynyń Qazaqstanǵa sapary ótedi. Delegatsııa quramyna Aýstrııa, Ispanııa jáne Nıderland ulttyq parlamentteriniń múshelerimen qatar, Qyrǵyzstan men Ózbekstan depýtattary da kiredi», - dedi A. Smadııarov vedomstvodaǵy aptalyq baspasóz máslıhatynda.

Sapardyń maqsaty – parlamentaralyq yntymaqtastyqty damytý, sondaı-aq klımattyń ózgerýine qarsy kúres, transshekaralyq sý resýrstaryn paıdalaný, taza energııany damytý jáne elimizdiń saıası ómirindegi áıelder men jastardyń rólin ilgeriletý máseleleri boıynsha tájirıbe almasý.

«Sapar baǵdarlamasynda F. Karımıdiń Parlament Senaty men Májilisiniń, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń, syrtqy ister, densaýlyq saqtaý, ekologııa jáne tabıǵı resýrstar, mádenıet jáne aqparat mınıstrlikteriniń basshylyǵymen kezdesý ótkizýi josparlanǵan. Sonymen birge, EQYU Parlamenttik Assambleıasy delegatsııasynyń Ortalyq Azııanyń óńirlik ekologııalyq ortalyǵy men Araldyń halyqaralyq qutqarý qorynyń basshylyǵymen kelissózderi josparlanǵan. Sapar qorytyndysy boıynsha Qazaqstanǵa EQYU Parlamenttik Assambleıasynyń jyl saıynǵy sessııasynyń (2024 jylǵy 29 maýsym – 3 shilde) alańdarynda Býharestte (Rýmynııa) Ortalyq Azııadaǵy sý resýrstaryn basqarý taqyrybyna saıd-ıvent ótkizý, sondaı-aq atalǵan is-sharada qaralatyn tıisti qarardyń jobasyn ázirleý eskerilgen», - dedi resmı ókil.