Qazaqstanda brıtandyq ýnıversıtettiń fılıaly ashylady

ASTANA. QazAqparat - Búgin QR Ǵylym jáne joǵary bilim mınıstri Saıasat Nurbek álemdegi jetekshi zertteý ýnıversıtetterdiń biri Heriot-Watt basshylarymen kezdesti. Kezdesý aıasynda brıtandyq joǵary oqý ornynyń Q.Jubanov atyndaǵy Aqtóbe óńirlik ýnıversıtetimen seriktestigi talqylandy, dep habarlaıdy QazAqparat.

Bastama Memleket basshysy Qasym-Jomart Toqaevtyń joǵary bilim berý júıesin ekonomıkanyń suranystaryna saı qaıta formattaý jónindegi tapsyrmasyn oryndaý sheńberinde, onyń ishinde jetekshi sheteldik joǵary oqý oryndarynyń fılıaldaryn ashý jolymen iske aspaq.

Kelisim boıynsha Heriot-Watt ýnıversıteti Jubanov ýnıversıtetiniń bazasynda úsh («Munaı-gaz isi», «Elektronergetıka», «Kompıýterlik ınjenerııa») bakalavrıat deńgeıindegi bilim berý baǵdarlamasyn, sondaı-aq «Ónerkásip menedjmenti» mamandyǵy boıynsha magıstratýra baǵdarlamasyn ashady. Bul mamandyqtar óńirdiń suranysyna qaraı tańdalyp otyr.

«Joǵary oqý oryndarynyń arasyndaǵy seriktestik otandyq tehnıkalyq jáne IT mamandardy birlese daıyndaýǵa baǵyttalǵan. Oqýdy aıaqtaǵan stýdentterge Heriot-Watt ýnıversıteti men Jubanov ýnıversıtetiniń qos dıplomy beriledi. Bul mamandyqtar Ulybrıtanııalyq standart boıynsha oqytylyp, Heriot-Watt Ýnıversıteti baqylaıdy. Talapkerlerdi qabyldaý kelesi oqý jylynda bastalady», – dedi Saıasat Nurbek.

Brıtandyq ýnıversıtettiń ókili Jubanov ýnıversıtetimen yntymaqtastyqty damytý týraly josparlarymen bólisti. Eki joo arasynda akademııalyq utqyrlyq baǵdarlamalary belsendi damıtyn bolady.

Heriot-Watt ýnıversıteti – 1821 jyly negizi qalanǵan álemdegi jetekshi zertteý ýnıversıtetterdiń biri. Matematıka, hımııa ınjenerııasy, qurylys, elektr tehnıkasy jáne munaı-gaz isi pánderi boıynsha álemdik QS reıtınginde úzdik 300 ýnıversıtettiń qataryna kiredi.