Qazaqstanda brendtik aıaq kıim kólemi bir aıda 80%-ǵa artty

ASTANA. QazAqparat – Bıyl naýryz aıynda 6 145 348 aıaq kıim tańbalanǵan, bul – aqpan aıyndaǵy kórsetkishten 80%-ǵa (3 365 438) joǵary. Bul týraly QazAqparat Indýstrııa jáne ınfraqurylymdyq damý mınıstrligine silteme jasap habarlaıdy.

Sonymen qatar, 2022 jylmen salystyrǵanda taýarlardy tańbalaý men qadaǵalaýdyń aqparattyq júıesindegi bıznes belsendiligi 46%-ǵa ulǵaıǵany baıqalyp otyr.

2023 jyldyń 1 sáýirinen bastap elimizde aıaq kıim ónimderin tańbalaý men qadaǵalaý erejeleri tolyq kúshine endi. Demek, budan bylaı taýarlardy tańbalaý men qadaǵalaýdyń aqparattyq júıesinde tirkelmegen aıaq kıimdi satýǵa tyıym salynady.

Mindetti tańbalaý protsesine aldyn ala daıyn bolý úshin kásipkerlerge eki jyldan astam ýaqyt berildi: 2019 jyldyń 30 maýsymynda bastapqy joba iske qosylsa, 2021 jyldyń 1 qarashasynda aıaq kıimdi tańbalaý erejeleri bızneske kóptegen jeńildigi qarastyrylǵan zańnamalyq erejege aınaldy.

Taýarlardy tańbalaý men qadaǵalaý júıesiniń negizgi maqsaty – Qazaqstanda ashyq saýdany damytý. Júıede aıaq kıim ónimderiniń kartasyn tirkegen soń oǵan qatysty aqparat paıda bolady. Sonyń negizinde ónimniń biregeı tańbalaý kody qalyptasady. Sol arqyly ár aıaq kıimniń danasy jeke, ıaǵnı bólek qadaǵalanady.

«Birinshiden, tańbalaý protsesi tutynýshylardyń quqyqtaryn qorǵaýǵa baǵyttalǵan. Bul arqyly satyp alýshy qajetti ónim týraly tolyq aqparatqa qanyǵyp, tańdaý quqyǵyn ıelenedi. Tańbalaý men qadaǵalaýdyń ekinshi mańyzdy maqsaty – kóleńkeli ekonomıkany tejeý, ıaǵnı zańsyz ımportty jáne oǵan qatysty naryqty joıý kózdelip otyr», - dedi QazTextileIndustry (derbes basqarý uıymy) ulttyq jeńil ónerkásip qaýymdastyǵynyń basqarma tóraǵasy Gúlmıra Ýahıtova.

Byltyr elimizde qańtar-naýryz aralyǵynda 223,9 myń dana aıaq kıim shyǵarylsa, bıyl onyń mólsheri 421,5 myńǵa jetken. Óndiristik dınamıka 88%-ǵa artqan.

Aıta ketsek, Qazaqstanda tsıfrly tańbalaý men qadaǵalaý tetigi 3 ónim túrine qoldanylyp keledi: 2020 jyldan bastap temeki ónimderine, 2021 jyldyń qarashasynan bastap aıaq kıim ónimderine, 2022 jylǵy qarashadan beri 90 dárilik zatqa.

Buǵan deıin habarlanǵanyndaı, aıaq kıimniń tsıfrlyq tańbalanýy baǵanyń ósýine áser etpeıdi.